Mizoram record siamtu Rempuii leh Ramsanga

November ni 19-25, 2024 chhunga MPIS Niladri Vihar, Bhubaneswar, Odisha-a khelh zawh tak Yonex-Sunrise 47th Inter State – Inter Zonal & National Junior Badminton Championship 2024-ah C. Lalramsanga, s/o C. Lungmuanpuia, Durtlang leh Lalrempuii d/o Albert Lalrosanga (L), Serchhipte chuan Mizoram tan gold medal an vaw chhuak.
National Junior Badminton Championship-ah hian tunhmain Mizote’n medal kan la la ngai lo a, tun tum hi kan vawikhat lakna niin, Ramsanga hi mixed doubles-ah a champion a; girl’s doubles category-ah Rempuii a champion ve thung.
C. Lalramsanga hi a partner Vishakha Toppo, Odisha lam mi nen mixed doubles category-ah an khel a, seeded no 5 niin bul an tan.
An match hmasaberah Nishkarsh Singh Chauhan leh Vanshika Thakur-te tangdun chu 21-19, 21-15-in an hneh phawt. Round of 16-ah Kartik leh Srija-te inkawp chu 21-9, 21-11-in an hneh leh a; quarter final-ah tournament seeded no 1, Vansh Dev leh Mayan Ralhan inkawp lakah 13-21, 21-16, 21-13 hnehna an chang leh a ni.
Semifinal-ah seeded no 3, Bhavya Chhabra leh Taarini Suri-te inkawp chu 21-17, 21-18-in an hneh leh bawk.
Final-ah hian seeded no 2, Bhargav Ram Arigela leh Vennala K. tangdun tum lehin, 21-16, 10-21, 21-18-in an hneh leh a ni.
Ramsanga leh Vishakha thawkdun hian September thla khan Panchkula-a Yonex-Sunrise 31st Smt Krishna Khaitan All India Junior Ranking Badminton Tournament 2024-ah gold medal an lo vawchhuak tawh nghe nghe a; Mizo zinga junior category-a champion thei hmasa ber a nih hnuin National Junior Badminton Championship-ah pawh champion thei hmasa ber a ni leh ta a ni.
Girl’s doubles category-ah Lalrempuii leh Tanoo Chandra (Chhattisgarh)-te inkawp chuan unseeded niin tournament an hmachhawn a; an match hmasaberah tournament seeded no 1, Pravandhika R. leh Reshika U inkawp chu an tum nghal a, 21-19, 21-17-in an hneh.
Round of 16-ah Samridhi Bhardwaj leh Saanvi Nautiyal thawkdun chu 21-17, 21-11-in an hneh leh a; quarter final-ah seeded no 7, Deepika Devanaboina leh Sravanthi Devanaboina inkawp lakah 18-21, 21-13, 21-13 hnehna changin, semifinal-ah seeded no 5, Gayatri Rawat leh Mansa Rawat tangdun chu 13-21, 21-15, 21-15-in an paltlang leh.
Final hmuhnawm takah seeded no 3, Durga Isha Kandrapu leh Taarini Suri-te inkawp chu 23-21, 21-15-in an hneh leh a, Mizo hmeichhe zingah Sub-Junior, Junior leh Senior National level tournament-a champion thei hmasa ber leh medal hrim hrim la thei hmasa ber niin, record ropui bik a siam.
Rempuii leh Ramsangate hi National Centre of Excellence, Guwahati-a badminton zir mek an ni a; Ramsanga hi Mission Veng Badminton Club player niin, Rempuii hi Ralte Villa Badminton Club player a ni thung.
TATA Trusts (NEIDA) leh Mizoram Badminton Association (MBA) thawhhona atanga inzir chhuak, Pullela Gopichand Badminton Academy (PGBA)-ah pawh lo awm tawh thin an ni.
Mizoram Badminton Association chuan Rempuii leh Ramsangate hi a lawmpuiin a chhuang takzet tih thuchhuah siamin an tarlang a; Mizoram leh India ram tihmingthatu ni zel turin duhsakna sang ber an hlan nghal bawk.
Aan player-te’n hetiang dinhmun an thlen theih chhan hi TATA Trusts (NEIDA)-te nena an thawhhona vang a ni tih MBA chuan a hria a, an chungah lawmthu an sawi nawn mawlh mawlh tih an tarlang tel.
Yonex-Sunrise 47th Inter State – Inter Zonal & National Junior Badminton Championship 2024-a Mizoram coach hi Lalruatpuia niin, manager hi AC Zonunmawia a ni.