Myanmar tualchhung buaina avanga sawrkar sipai leh mipui pawl sipai inbeihna kalzelah Mizoram Champhai district ramri hnaihah an inkap thar a, mipui sipai leh tualchhung mi 7 thi in, hliam mi 20 vel Mizoram lama enkawl tura lak an ni tawh.The Aizawl Post thudawn danin, Mizoram leh Myanmar inhnaihna, Zokhawthar chhak Khawmawi leh a chhehvelah kar kalta tawp lam khan sawrkar sipai leh mipui sipai hi an inhnaih leh tan a. Inrinni tlai thim hma atang khan inkapin, Rihkhawdar leh Khawmawi chuanchunga sawrkar sipai awmna (bahrik) chu an beih ber a ni a, hei hi Pathianni zing lamah an la fel a ni.
Hetihlai hian sawrkar sipai lam hian indo thlawhna leh helicopter bakah lei lamah rocket propelled grenade hmangin an rawn beilet a, bomb thlak siper tawngtu leh silaia kah vanga hliam tuar hi an awm phah ta nual nia sawi a ni.
Hriat theih chinah he inbeihnaah hian Myanmar-a mipui sawrkar sipai mi 6-in nunna an chan a, tualchhung mi pakhat, Zokhawthara raltlana rawn lut, Myanmar lama a luh leh laia silaimu leng dawng fuh Chungthianmawia (51), Khawmawi Myanmar chu a thi bawk. Hliam tuar pawh mi 20 vel enkawl tura luhpui an ni a, an zinga 7 chu Aizawla enkawl tura lak zui an ni.
Inbeihna thar awm leh vang hian Khawmawi, Rihkhawdar, Haimual leh a chhehvel hmun dang atangin Zokhawtharah raltlan an luh belh leh nual nia sawi a ni a. Mizorama tlanlut bakah ramhnuai lama awmhmun khuar rih te pawh an awm nia thu dawn a ni. An khuaa raltlan mi 6500 vel awmsa chu mi 100 velin an belh leh a, chutihlaiin, ralmuan deuh huna let a, lutchhuak reng an awm avangin raltlan tia chhal theih zat hi chiang taka vawn har a ni tih Zokhawthar khawtlang hruaitute chuan an sawi a ni.
Sub Hqrs. YMA Champhai huaihawtin inbeihna kaihhnawiha hliam tuar, thisen mamawhte tan a thlawna thisen pek neih nghal a ni a, hriat theih chinah unit 42 pek a ni tawh a ni.
Mizoram ri hnaih Myanmar-a inkahna avangin ramri ah buai
