‘Mizoram Savate (Mizoram Birds Illustrated)’ tih lehkhabu Lalram Thanga leh Lalmalsawma (fam) te ziah chu Ningani khan chief secretary Dr Renu Sharma chuan a tlangzarh.
He lehkhabuah hian Mizorama sava chi hrang 275, a lem nen ziah a ni a. Mizorama sava zirna hmasa ber neih a nih dan, sava hriatchian leh chhinchhiah dan leh sava zir turin tih tur leh tih theihte tarlan a ni.
Chief secretary chuan hetianga lehkhabu hlu tak, Mizo tawnga ziak a ni chu lawmawm a tih thu a sawi a. Nungcha humhalh kawngah mipui zirtira kaihruaitu pawimawh tak a nih a beisei tih a sawi.
Lehkhabu tlangzarh rual hian Lalram Thanga kutchhuak sava leh ramsa lem thinga ker 50 chuang phochhuah chu principal chief conservator of forest RS Sinha chuan a khuhhawng nghal a. PCCF chuan thinga milem ker hi Mizote thiam zawng tak a ni, tiin, kan ram rohlu nungcha leh savate, mipui hmuh theiha phochhuah fo a pawimawh a, zirlai leh thangtharte tan chona tha tak a ni, tiin a sawi.
Lehkhabu siamtu Lalram Thanga chuan a thianpa Lalmalsawma’n an zawh hma in a boralsan thut avanga harsatna an tawh dan a sawi a. Mizo mipuiin Mizoram sava hming mahni tawng mai baka Sap hming tlanglawn leh scientific hming thlenga an sawi theih nana buatsaih an ni tih a sawi. Lehkhabu hi ramhnuai (field) a sava zirmite tanpuitu (guide) ang tura an duan a ni tih a sawi.
Thinga milem ker hi tui vanga a hun awla tuk thin (hobby) a ni tih a sawi a. Milem 50 chuang, size hrang hrang entir a ni. Wildlife Wood Curving Exhibition hi vawiin, December 1 thleng hian Chief Wildlife Warden office building-ah a duh tan chhim theih a ni.
Mizoram sava chanchin ziahna siam
