Mizoram Science Mela nei
Sports & Youth Services department leh Mizoram Science, Technology & Innovation Council (MISTIC) buatsaihin Mizoram Science Mela 2024 neih a ni a, Thawhlehni khan minister Lalnghinglova Hmar chuan a khuhhawng.
Science Mela hi 28th National Youth Festival puala programme ruahman niin, sawrkar laipuia Ministry of Youth Affairs & Sports leh Ministry of Science & Technology tangdunin India state tinah an buatsaih a. Thupuiah “Innovation in Science & Technology” tih hmangin kum 15-29 inkarten science lam kaihhawiha an thil siamchhuah an pho chhuak a, inel a ni.
Mizoten science kan ngaihpawimawh thar a tul tih Lalnghinglova Hmar hian sawiin, science chu subject harsa leh danglam bik niloin, taima tak leh thahnemngai taka zir chi a ni tih a sawi. Zirlai leh thalai kalkhawmte chu thil siamchhuah hmangtu ringawt niloa a siamchhuaktu zinga tel ve theia hma la turin a chah bawk.
Mizoram Science Mela-ah hian district hrang hrang atangin mi 25 an inel a. Vawiin – December 11 hian neih chhunzawm a ni ang. A titha zualte hian Mizoram aiawhin 2025 January 12-26 inkar hian New Delhi-a 28th National Youth Festival-ah an thilsiam an pho chhuak dawn a ni.
Mizoram Science Mela hi department hrang hrang atanga official-te, school naupang leh science lam tuimiten an chhim a ni.
Mizoram Science Mela nei
