Mizoram State 9 Ball & 10 Ball Pool C’ship 2024

Mizoram Snooker & Billiards Association (MSBA) buatsaih Mizoram State 9 Ball & 10 Ball Pool Championship 2023-24 chu kar liamta Inrinni tlai khan MSBA Hall, Hawla Indoor Stadium, Republic Vengthangah a hmawr bawk a ni a, 9 Ball Pool-ah Lalsangzela, Khatla South champion-in, 10 Ball Pool-ah T. Laltlansanga, Lunglei Chanmari a champion ve thung.
Mizoram State 9 Ball & 10 Ball Pool Championship 2023-24 final leh kharna hunah hian Lalbiakzuala, Principal, Govt Aizawl College chu khuallian niin, lawmman semna hun hi KL Vanlalruali, treasurer, MSBA-in a kaihruai.
10 Ball Pool final-ah Lunglei Chanmari tlangval T. Laltlansanga leh Aizawl Upper Republic tlangval T. Lal.anpuiate an intum a, Tlansanga’n 8-5 hnehna changin, 10 Ball Pool champion a ni. T. Laltanpuia hi MSBA general secretary a ni.
9 Ball Pool final-ah T. Laltlansanga, Lunglei Chanmari leh Lalsangzela, Khatla South inhmachhawn ve thungin, Sangzela’n 8-5 hnehna nen bawk 9 Ball Pool champion nihna a hlawhchhuak.
Mizoram State 9 & 10 Ball Pool Championship 2024 hi March ni 18 ah khan khelh tan a ni a, Mizoram hmun hrang hrang atangin player 80 chuang an tel.
Champion leh runner up-te hian trophy, citation leh pawisa fai an dawng.
He championship hi MSBA buatsaih niin, Mizoram State Sports Council (MSSC)-in an sponsor a; quarter-final atangin Explore Mizoram Youtube channel-ah live-a pekchhuah thin a ni.
Kharna huna khuallian Lalbiakzuala chuan, “Cue sport hi a game a sanzia leh thluak hman ngaihna leh thluak sawizawina dik tak a nihzia a takin ka hmu tawh a, mi nawlpui chunglam chauhin an khelh turah an dah thin a, mahse, tu tan pawh khelh theih a nihzia a takin ka hrefiah tawh a ni.
“Rilru hrisel loh vanga kan ramin harsatna a tawh mek laia thluak hman ng aihna infiamna in kalpui hi kan ram harsatna tam tak sutkianna’n a pawimawh.
“Tun aia nasa hian kan thalaite hian khel se – miin hetianga ngaihtuahna tak tak senga a khel a nih chuan ruihhlo tihna’n hun a awm lo a, ruihtheihthilin a tihbuaina hun a awm loin ka hria a, kan intihhhmuh a pawimawh hle.
“Zirlaite zingah pawh nasa lehzualin he game hi kan promote a ngaiin ka hria a, kan tih theih ve zawng a awm a nih chuan theihtawp kan chhuah tlang ang,” a ti bawk.