Mizoram State Legislative Assembly Session 9-na thutkhawm vawi hnihna chu Thawhtanni khan tan a ni a. House-a thu sawitu larsap Dr Hari Babu Kambhampati chuan House member-te chu anmahni thlangtlingtute laka an bat leh mawhphurhna hre turin a chah.
Mizoram state pian champha vawi 37-na chu Thawhlehni khan Mizoram hmun hrang hrangah lawm a ni a. Aizawlah chuan larsap Dr Hari Babu Kambhampati leh chief minister Lalduhoma te ho nen sawrkar hotuten an hmang.
Larsap chuan Zoram mipui chibai a buk a. 1986 June 30-a remna thuthlung ziah hnuin remna leh muanna awm nghalin, State of Mizoram Act 1986 hmangin state puitlinga hlankai a ni tih a sawi. Mizoram chu state 23-na pek a ni mai loa, a bik taka inrelbawlna atan India Danpui chhungah Article 371-G siamsak a ni, tiin, state pangngai angin 1987 February 20 khan bul a tan tih a sawi a ni.
“Mizoramin hunrei tak buaina tuar mah se, remna leh muanna thuthlung ziah a nih hnuaah kum 37 chu India ramah state ralmuang ber a ni mek a. Mizoramah inthlanpui felfai, muanawm leh thianghlim taka kan hmachhawn thin leh Assembly House chhungah MLA-ten zahawm taka ro an rel thin hi a entawn tlak a; India ram hmundangah pawh Mizoramin House a kalpui dan leh inthlanpui a hmachhawn thin dan hi chhuang takin ka sawi thin,” a ti.
Remna leh muanna chu kawng tinrenga hmasawn turin a pawimawh hmasa ber tih Dr Hari Babu Kambhampati hian a sawi a. A dawtah sawrkar ngelnghet a pawimawh leh, tiin, heng thil pahnih hi Mizoramin a nei ve ve a, sawrkar hruaitu tharte pawhin theihtawp chhuah an tum bawk nen, Mizoram tan beiseina eng a awm mek tih a sawi.
Chief minister-in a lo puan tawh ‘100 Days Program’ chu chak taka kalpui a nih avangin phurawm a tih thu a sawi a. Sawrkar thar hnuaia kuthnathawktute chawikan tumna, kan thil neihsa hman tangkai, sum leh pai renchem leh tul loa sum hman tihtawp leh hmalakna dang chuan hmasawnna kawngah min hruai dawn tih a sawi bawk.
Chief minister chuan Mizoramin state a neih theihna kawnga hruaitu hmasate hmalakna a sawi a. Article 371-G siam a nih dan, he dan danglam bikna leh a nihphung sawiin, “Mizoram thil neih hlu ber leh kan himna kulhpui a ni,” a ti.
State kan nih hma kum 25 khan state dangte chuan kawng tinrengah hmasawnna rahbi an lo tuk tawh a, hmasawnna ruhrel tha tak tak an lo din tawh tih a sawi a. Kum 25 chhung hian mumal takin India ram chuan hmasawnna program, 5- year plan vawi 5 a kalpui daih tawh tih sawiin, “Heng hun hlu tak, hmasawnna program tam tak kan hloh hnuah, bul kan tan avangin kalmuang thiang kan ni tawh lo a. Midang umphak tur chuan midangte kal aia kal chak a ngai a, midang aia thawh tam leh thawhrim a ngai zawk a ni,” a ti.
State Day lawmna hi chief secretary Dr Renu Sharma chuan a kaihruai a. Under secretary rank leh a chunglam officer zawng zawng kal vek tura tih an ni. NGO hruaitute leh sawmbik mi thenkhatte an tel bawk.
Mizoram State chu:
8 Square kilometre 21087 vela zau a ni a, hmar lamah India state – Assam, Manipur leh Tripura nen a inri a, khawchhak lamah Myanmar leh khawthlang lamah Bangladesh nen international boundary an intawm.
8 Kum 2011 census-a a lan danin mihring awm zat 1,091,014 a ni a. Chhut dan hrang hranga tarlan ang chuan tuna Mizorama mihring awm zat hi nuai 13 vel nia ngaih a ni.
8 Lok Sabha leh Rajya Sabha-ah seat khat ve ve a nei a. State legislative Assembly-ah seat 40 a awm.
8 Mizoramah hian Autonomous District Council pathum a awm a. Tunah hian Mizoram hi district 11-a then niin, sub division 24 leh RD Block 28 a awm a ni.