Site icon The Aizawl Post

Mizoram Sub-Junior Team kutah medal 3

Mizoram Sub-Junior Team kutah medal 3
March 25-27, 2023 chhunga Cuttuck, Odhisa-a khelh zawh tak 36th National Sub-Junior Taekwondo Championship-ah Mizoram Sub-Junior Team chuan silver medal pakhat leh bronze medal an hlawhchhuak.
Mizo team medal lakna hi Kyorugi leh Poomsae inelnaah niin, silver medal latu hi MZU Taekwondo Club zirlai Laltlan-mawia niin, under 29kg category atanga a petchhuah a ni a; Poomsae inelnaah Arella Roluahpuii leh Joshua Lal-thlangdikaten bronze medal pahnih an hlawh chhuak bawk.
Mizoram Best Fighter 2022 atana thlen MZU Campus naupang Tlanmawia hian a match hmasa ber a bye a, second round atangin match bul a tan a, Puducherry player tumin a khel tha nghal hle a, 13-1-a an inthlauh avangin point gap hmangin a chak nghal a ni.
A match hnihna quarter-final match-ah Tamil Nadu aiawh tumin, deciding khelh hial ngaiin an inhnehtawk a; point 13-7, 15-21-a an inhnehtawk hnuah 18-25-in a chak hram a, semi-final a lut.
Semi-final lamah hian Chhatisgarh champion nen intumin game pawh a tang hle a, mahse, Tlanmawia hi khawng takin a tang tluan thei a, 6-4, 8-6-a round a lak ve ve avangin final a lut ta zawk a ni.
Final-ah hian Bihar champion nen insuin, round an inlakchhawk a, 14-5-a Bihar player-in a lak hnuah Tlanmawian 2-7-in a la ve thung.
Deciding round-ah hian Tlanmawia chesualin a vanduai zawkah a tang a, 19-11-in Bihar lakah a chak zo ta lo a, Silver a awrh ta a ni.
Poomsae inelnaah female individual category-a khel Arella Roluahpuii, Gidae TC/Venghnuai chuan bronze medal a hlawhchhuak a; pair inelnaah Joshua Lalthlangdika, Exodus School Taekwondo Club/Chaltlang nena tangdunin bronze medal an hlawhchhuak bawk.
Inkhel dangah Under 41 kg-a khel Zaihruaimawii (Mission Vengthlang/GidaeTC) chuan Manipur aiawh hneh lovin quarter-final chinah a tawp a; Lalhruaitluanga Under 27 kg (MZU TC) pawh a tumpui Odhisa mi paltlang zo lovin a zin kawng a titawp bawk.
Mizoram team hi Vanlalmawipuia’n a hruai a; Mizoram team-te hian nimin khan Cuttuck an rawn chhuahsan a, March ni 29-31, 2023 chhunga MATA Hall-a buatsaih tur 17th Mizoram Open Taekwondo Championship khel leh hmanin an rawn thleng ang.

Exit mobile version