Mizoram Super League X Champhai
04 lamah aw ni ang…
Sharda University Mizoram Super League (MSL) X chu khelh chhoh a ni zel a, R. Denghuama Indoor Stadium lamah result beisei lawk loh lam a thleng nawk – chu’ng zingah chuan MSL nomawi kawl mek Zarkawt BCA-in tum thum an khelh tawhah tum khat chiah an chak hi a tel!
Hawi let zuai ang
Khatla TBL-in game rang tak nen an tumpuite an nawr thin a, player langsar |hazuala leh Thiangate kiangah Emmanuel-a a par a, a vul tel.
An hnam dang player lakluh an chetha zui bawk a, game 3 an khelh tawhah hnehna an chang fai vek.
Zemabawk BC hi tun dinhmuna team hmuhnawm ber tia chhal ngam hial an ni ang. Point guard tha Rozama an nei a, ani hian captain hna a tlin hle. An coach Sangpuia hi MSL X khelh meka team game rawn lantir tha ber lawrlak a tih ngam. A player-te a hrechiang a, ani hnuaiah hian beisei an nei sang zual sauh ang.
Chanmari BC hi an coach Nuna hovin an bazar fuh a, an Mizo player-te khel tha telin champion lai Zarkawt BCA hnehin an barakhaih! Semi-final luh beiseiawm Champhai an hneh zui leh thei.
Senior player Moses leh Kanan val Nunate khel en hian Chanmari BC tan champion nomawi sawi rik a zuamawm ang.
Electric BC hi an bazar sual deuh nge ni, match thumah hneh an la nei lo!
Mak tak maiin match hnih khel tawh Bungkawn LB
Saron BC hian tum hnih an khelh tawhah chak leh hloh an nei a, an last match thlirletin an coach Lana ho hian semi-final beisei ngam tur an ni – player inhliam Dodo-a dam an mamawh.
Chalo, Champhai
Ni 5 chhung zet MSL khelh a ni tawh a, inelna hawi lam thlak a ni dawn e.
Mizoram Basketball Association (MBBA) hnuai district zinga nung ber Champhaiin a tumkhatna’n Aizawl pawnah Mizoram Super League an thleng dawn.
Champhai District Basketball Association (CDBBA) hi an phurin inbuatsaihna pawh an nei tha a, tum sawm chuang MSL an thlen tur pual hian an hnatlang tawh – lang lo lama an hruaitute inpekna leh an thlantui te hi hlu tak a ni. CDBBA lama an puipate hian mikhual tam thei ang ber thlen inhuamin an phur tawh hle.
Mi 600 nuam tawk taka an len theihna Vanlallawma Indoor Stadium (Vanis)-ah March ni 18 – 21 thleng MSL khelh a ni dawn a, Champhai hotel pathum chu CDBBA nena thawkhovin mikhual thlen an inpeih ta.
A thlengtu lam thukhawchang
CDBBA hi kum 2000, February ni 5 khan din a ni. Kumin hi an kum 25 tlin cham (silver jubilee) a ni nghe nghe a, theihtawpa ropuia lawm an tum – MSL 10 thlen hi lawmna peng pakhat a ni.
He thil a thlen theihna tur hian MBBA chuan MSL thlen an dilna hi a remtihsak a, Champhai zo boruak thiang kak hip turin MSL team lam bakah Zonet Production crew lama production director Francis-a leh a nau Jka-te an inpeih ta – Champhai Cable Network (CCN) leh Zonet lam hian live in an pe chhuak leh dawn.
CDBBA-in Mizoram huapa hniak an hnutchhiah tawh thenkhatte:
1. Kum 2010 khan Aizawl pawn atanga Central YMA Inter Branch inelnaa champion hmasa ber leh awmchhun an ni.
2. Kum 2022 khan Aizawl pawn atanga Inter District champion hmasa ber leh la awmchhun – Minikins BC.
3. Aizawl pawn atanga MSL qualify hmasa ber leh awmchhun – 2022/23/24 (season 3)
4. District association (private academy ni lo) basketball academy nei hmasa ber (2015) an ni bawk.
CDBBA President
Pu R. Lalbiakzuala (Ma-puia) chuan, “Basketball hi eizawnna a tling lo an tih hi ka vei ve em em a, a chhan chu thalaiin ruihhlo ti loa hriselna lam leh mahni inthununna’n/invawnna’na an khel ringawt pawh hi a hlu em em tawh a, chu mai bakah infiammi chu khawtlang/kohhranah pawh mi tangkai an ni tlangpui thin.
“Basketball leh ruihlo tih chu inmil lo tak a ni. Tin, tunlaiah chuan hman ang a ni tawh lo a, kan basketball player-te hi MSL-ah ngat phei chuan thlatin sum/hlawh nei an ni deuh vek tawh. Keini lamin MSL team kan neih Champhai BC ngei pawh hi
“Tin, mi thenkhat city police leh Army a, chu mai bakah zirlai tan pawh vairam leh Mizoram school tha, college leh university thaahte an luh phah nasa hle.
“Institution tha apiangah basketball an dahsang em em a, chuvangin basketball hi game namai lo a ni tih hi ka tarlang tel ve duh a ni. Eizawnna tha tak a la ni chho dawn chauh.
“A tawp berah chuan hman atanga ka lo dream tawh, a hminga ka president lai ngeia India rama professional league lian ber anga chhal ngam MIzoram Super League kan khua ngei Champhaia kan thleng tur hi ka lawm takzet a ni,” tiin The Aizawl Post (Hoops Mania) hnenah a thlirna a hrilh.
– |pa Bunghai