Mizoram Super League X
Round 4-na hmawrbawk a ni ta
Sharda University MSL X chu R. Dengthuama Hall, Salem vengah March ni 25 zan khan kharna neih a ni a, semi-final lut tur leh MSL atanga club pathum tla (relegate) tur ruangam a lang ta ruak.
Inkhel bihchianna
March ni 25, Thawhlehni zan khan inkhel match hnih a awm a, Saron BC leh champion beisei ngam tur khawpa khel tha tluang Zemabawk BC-te’n an khingpuite lakah hnehna an chang ve ve.
Inkhel hmasa zawkah Bungkawn LB in MSL X-a an chak theih loh thaichhiatna hun remchang neiin lang zet mah se Saron BC tan inthlahdah a thiang bik lova, a tawpa chak zawk chu Saron BC an ni.
Inkhel hmuhnawm anni team pahnih hian an chhawpchhuak a, Champhai week hmang tha Bungkawn LB player JS Sylver (42 points) chu khel tha viau mah se Ruatkima (12 pts) leh Fakzuala (13 pts)-te nena an chetthat a tawk zo lo.
MSL X-a an point neih tam ber (84 points) zan hian Saron BC tan player 5 laiin point 10 chuang an nei phak a, Chanmari BC laka tlawm hlim hi Bungkawn LB tan an khirh hret!
Hriatzela thlir rawn hlawh zanah hian point 24 ngawt a nei a, thlawptu tha A. Tyagi leh Ramdinfelate’n point 17 lai an nei zui ve ve a, pressure sang tak hnuaiah an coach Lana hovin hnehna an chang.
Inkhel match hnuhnung zawkah hian MSL X-a game hmuhnawm fal nalh ber chhawpchhuah a ni a, champion inbeisei ngam Zemabawk BC chuan 85-79-in Chanmari BC lakah hnehna hlado hlu bik an chham!
Zemabawk hmatawng Perkins Jr. (34 pts) a hot leh pek hle.
MSL X khelh meka tualchhung tlangval zinga khel tha ber meka chhal ngam Kanan veng val zakzum Rozama (14 pts) pawh an coach Sangpuia lawmna thlen nawn leh turin a chetha leh viau.
Zotlang tlangval Rinchhana (10 pts) hi haider theih loh khawpin a khel a langsar tial tial a; an Delhi tlangval N. Beniwal pawh hi a game a fing – a chah chhuaktu bazar fuhzia hi!
Hetih lai hian tawnhriat ngah rual Mizo player kawltu Chanmari BC tan hian GD Maggee (21 pts) a khel tha tawk lova, Nuna (27 pts) leh Big Mike (17 pts)-te erawhin an thawhhlawk hle.
Moses-a chet hleih theih loh zan hian an coach Nuna leh asst. coach Reuben-a P. Sachdeva leh tualchhung player sulhnu nei tha tawhte lakah rinna an nghat ngam tawk lovin a lang!
Hoops Mania
Time Out
MSL X-ah hian team kaihruaitu coach chetha leh game hup hlum thaka risk la sawi tur an awm.
Hetih lai hian Dawrpui venga Pu Pazawna (L) fapa, Lalruatfela (Afela) khan MSL nomawi tum 4 hial a zawn zatin a chawipui thei. Zarkawt BCA tan MSL 4 – MSL 7 champion trophy Afela hian a lakpui.
Hnam dang player MSL tan dawn ruaiah team tinin an lalut a; anni tel lova MSL puala Mizo player thla tam an team tana lo khel tawhte kha a saseh inelna tan dawn ruaiah ring zo lovin, practice hona hun hnam dangte nen nei mumal mang lovin inelna hmachhawn zui a ni a, team tana thahrui tura ngaih hnam dang player hian team thenkhat khelh dan phung a tibuai zawk hial!
Mizo player leh hnam dang awmze nei taka siksawi thiama chhal ngam leh MSL-a tum 4 ngawt nomawi chawi tawh, Mizo basketball huanga sulhnu nei tha ber pawl Afela hi player enkawl kawngah fak leh chhuan tlak a ni a, chhuang takin ani hi The Aizawl Post Hoops Mania chuan a hniak hraw takte nen kan rawn chhawpchhuak e.
Mizoram Super League X Round 4-na hmawrbawk a ni ta
