Kar kalta Zirtawpnia Mizoram University-a 233rd Indian Road Congress Mid Term Council neihnaah, Union Minister of State for Ministry of Road Transport, Harsh Malhotra chuan, Chief Minister Lalduhoma’n Mizorama National Highway-te cement concrete-a chhun (rigid pavement) vek a rawt chu bawhzui an tum dawn tih a sawi a.
Chief minister hian Mizoram kawngpuite concrete road-a siam a tul thu a lo tlangaupui tawh thin a, a remchanna apiangah sawrkar laipui hotute hnenah pawh a lo thlen tawh thin nia hriat a ni. Tun tuma Union Minister-in hmalak tum a nih thu kan ram leilung ngeia min rawn hrilh ta hi a lawmawm hle a, a puitlin ngei theih nan ram hruaitute pawhin bawhzui chak ve bawk se, champion-pui ngei tum bawk se a duhawm hle a ni.
Hetih rual hian, eng vanga Mizoram kawngpuite hi chhe awl em em nge a nih thin tih hi mi tin zawhna a ni ngeiin a rinawm. Tunhma atang tawhin, ‘fur khat daih lo kawngpui’ tih hi a lo ri tawh thin a, chu chu a dik tih hretu chu Mizoram mipuite hi kan ni. Tuna sawrkarna rawn chelh thar party pawh hian, kawngpui chhia hi opposition lama an awm laia an auchhuahpui tam berte zinga mi a nih ngei a rinawm bawk. Kawngpui siam a han ni a, hna thawh that theih hun |hal laiin, hmanhmawh taka siam awm chuang si lovin, furpuiin a rawn nangching a, ‘ruah avangin hna thawh theih a ni lo’ tih chu chhuanlam a ni thin a. Fur a han liam a, kawngpui siam chhunzawm a han nih leh meuh chuan, thal laia kawngpui siam te pawh kha an lo chhe leh hman tawh a, kum khat daih kawngpui hi kan nei hlei thei lo a ni ber mai.
Kawngpui a that rei loh chhan pakhat chu a siam dan tur anga siam a nih thin loh vang hi a ni ber awm e. State dangah pawh ruah chu a sur vek tho, mahse alkatra luan kawngpui tlo tak an nei thei tho. Kan kawngpui siam dan quality a hniam tihna a ni mai; ‘Ruah’ chhuanlam reng chi pawh a ni lo.
Concrete pawh hi alkatra luan kawngpui (asphalt road) aiin ‘a tlo’ kan han ti tak na a, a siam hun laia kan vil uluk peih leh si loh chuan, mi ramin kun 20-30 chhe lova an zawh theih laiin, keini chuan kum hnih khat vel bak hi kan zawh hman leh lo mai ang tih te pawh, kawngpui kan lo buaipui tawh dan han thlir let hi chuan, a hlauhawm rum rum a ni.
Eng pawh ni se, Chicken Neck (Siliguri Corridor) kawngpui lama harsatna thleng thin pumpelh nana sawrkar laipuiin KMMTT Project a siamin Mizoram a paltlang avang hian, Mizoram kawngpuite hi thuam that a tul tih chu sawrkar laipui pawh hian a hai lovang tih a rinawm a ni.
Mizoram tan Concrete Road
