Mizoram tan sum tam zawk hmuh dan tur CM-in a dap

Mizoram tan sum tam zawk hmuh dan tur CM-in a dap

Mizoram tan sum tam zawk hmuh dan tur CM-in a dap
Chief minister Lalduhoma chuan sawrkar laipui atanga Mizoram-in sum tam zawk a hmuh theih dan dapin rawtna hrang hrang a thlen.
Hmarchhak state pasarih chief minister-te leh an aiawhte chu 16th Finance Commission member-te nen Thawhtanni khan New Delhi-ah an inkawm a. Mizoram chief minister Lalduhoma pawh telin state mamawh a thlen zingah, state sum bawm lian ber (devolution of taxes) tihpun chungchang a tel.
Sawrkar laipuiin state sawrkar hnena sum a pek dawnin mihring tam lam chu criteria pakhata a hman avangin, Mizoram ang mihring tlemnaah chuan kan tuar thin a, hemi kaltlanga kan sum hmuh tihpun a nih theihna tur criteria-a dah tel turin rawtna a thlen a ni.
Chhiatrupna atana sum pek thin (disaster risk index) ah chhiatna lianthamah lirnghing, khawkheng, cyclone leh tuilian dah a ni a. Mizoramin a tawrh nasat – leimin, ram kang leh ruah bawhawk avanga chhiatna thleng telh ve turin a ngen bawk.
Mizoram chu tlangram chhengchhia leh inkalpawh harsatna a nih avangin bungraw phurhna senso (transportation cost) chhut tel thin turin chief minister hian a ngen a. District Council tana sum tam zawk pe tura ngenna leh rural local body grant chhunzawm zel tura ngenna pawh a thlen a ni.
NE state aiawhte hian 16th Finance Commission hnenah dilna intawm – joint memorandum an thehlut nghal a ni.
Kum 5 chhung atana ram danpui Article 280-na anga sawrkar laipui leh state sawrkar-ten sum an insem dan tur duangtu 16-na rawtna (recommendation) hi nakkum April 1 atanga hman tan tur a ni a. 16th Finance Commission hian Mizoram pawh tlawh tawhin, an hmalakna kalzelah tunah hian hmarchhak state chief minister-te nen an inkawm leh a ni.

Comments (0)
Add Comment