Mizoram wrestling team kutah gold pali
Nagaland-a 3rd North East Games 2024 zawh fel takah Mizoram Wrestling Team chuan gold medal pali an hlawhchhuak a, Nagaland-a kal team zingah gold medal rut tam ber an ni.
Zirtawpni khan free style wrestling khelh a ni a, he hunah hian Mizo inchai palaihawl champion lai Remruatpuia of Saitual chuan final-ah chungnung takin kg 79 huanga Manipur inchaichak Basanta Patgiri a hneh a, gold medal hlawhchhuak turin second 23 bak a mamawh lo!
Round tan tir phat atangin Remruatpuia hian nawr nghalin, Manipur pa hnuaiah lut pheiin a kawngah a man bet a, a tharum ngahna hmangtangtaiin a pu kang a, chhuatah a keuh thlu nghal. Chungnunna a lantir avangin point khat a hmu.
Manipur wrestler chet leh hmain dar betin abawhbet nghal a, Basanta tan chetchhuah ngaihna a awm lo.
Round tan a nih atanga second 23-naah full point hmuin Mizoram tan Remruata hian gold medal a hlawhchhuak.
Free style wrestling kg 57 huang chhungah Mizo Inchai Pate champion lai B. Lalawmpuia (OP-tea) paw’n tuntum North East Games-ah hian a weight puite zingah ro a rel chiang hle a, a tumpui zawng zawng hun reilote chhungin a hneh fai vek!
Final bikah Assam wrestler tha Ashik Pingua chu second 40 chhungin a hneh a; round tan tirh phat atangin Assam inchaichak hian (OP-tea) hi nawrin a lu kuaikunin chungnung zawk nih a tum a, a kut pahniha OP-tea lu vuana keuh thluk a tum lai hian rang takin Mizo wrestler hian Ashik-a hnung lamah inherin a kawngah a kuah a, mat chungah a bawh thlu nghal. Referee in OP-a point khat a pe.
Hun rei nghak loin Assam inchaichak dinglamah Mizo tlangval hian a vir kual pui a, a duh tawk mai lo. Vawikhat a vir chhuahpui leh a, Assam pa tan talchhuah ngaihna a awm lo. Rinbial a hnaih avangin vei lam zawngin OP-a hian Assam inchaichak hi vawihnih a side roll leh hnuin chungnung takin Awmpuia’n full point a hmu a, Mizoram tan gold medal hlu tak a awrh.
Wrestling huang chhunga mi belt wrestling an tih bikah Mizo wrestler mipa paliin bronze an lak laiin kg 69 hnuai lam huang chhungah Champhai nula Penticos Lawmsangpuii leh Melriat nula, Mizo inchai nu laihawl champion lai Elizabeth Rohlupuii chuan an vawikhat khelhnaah gold medal hlu tak an thawkchhuak ve ve.
Manipur-in gold medal tam zawk an hmuh theihna tur dangchatin Penticos Lawmsangpuii hian Manipur inchaichak Laishram chu round khatnaah dar beta thehtluin round khatna a la a; chumi hnuah sir zawngin Lawmsangpuii hian a paihthlu nawn leh.
Round thumnaah Manipur inchaichak hian point hmu ve lehin, round 4 naah pawh Manipur-in point a hmu leh. Point 10 ve ve an hmuh hnuin chawlh lawk awm miah lovin round 5-na kaltlangpui a ni a; Lawmsangpuii hian a tharum ngahna hmang leh Manipur nuin paihthluk a tumna lamah a rihna hmangin dar betin Manipur inchaichak a keuh thlu a, Mizoram tan gold medal a hlawhchhuak.
Point an hmuh danah Manipur offical lamin complaint an siam a, NEO, Belt Wrestling official-te’n thutlukna dik siamin Penticos Lawmsangpuii chu chak zawk a ni tih an nemnghet nawn a ni.
Belt wrestling tho kg 60 huang chhungah Mizo nula pahnihin gold medal an in chuh a; Melriat nula Elizabeth Rohlupuii leh Lunglei nula Lalrinfelite’n final an khel dun a; Mizo inchai leh free style wrestling lama tawnhiat nei tam tawh zawk Elizabeth-i a chungnung a, gold medal a hlawhchhuak zawk.
Hetih mek lai hian Lalrinfeli hi North East Games 2024 Wrestling huanga medal pahnih awrh thei awmchhun a ni.
Wrestling Mizoram team inbuatsaihna a tha a, thlakhat chhung ngawrh taka camp neiin, hetih chhung hian nitin training hautak an kalpui thin a ni.
Mizoram wrestling team-ah wrestler 17 awmin, wrestler 13 zetin medal an awrh thei.
Heti hian Mizoram tan wrestling-in gold medal pali an la a, free style-ah pahnih leh belt wrestling-ah pahnih bawk a ni.
North East Games 2024-a Mizoram wrestling team medal lak dan chhawpchhuah a ni e.
Mizoram wrestling team kutah gold pali
