State pawn atanga lo lut zikhlum a tam avangin Samthang khuaa zikhlum chingtute chuan zikhlum dehralna lamah harsatna an tawk mek a, an mangang a, state pawn atanga zikhlum Mizorama lo lut tur dang turin sawrkar an ngen hial.
Social media lamah te pawh hmuh tur a awm a, zikhlum hralhna a harsat avang hian a duh apiangin a thlawna an lak theih turin khawlaiah an chhawp chhuak tawp mai a ni awm e.
Tunhma deuh pawh khan, Serchhip lamah hetiang deuh bawk hian, zikhlum tharchhuah dehralna an hriat loh chu khawlaiah chhungvumin khawnvartui leihin an lo hal hial tawh nia hriat a ni bawk.
Marketing lama hma lak a harsat chhan chu, ‘kan thawh chhuah a tam tham thin lo a ni’ tiin tunhma khan ram hruaituten an lo sawi tawh thin a. Kuthnathawktute an tang sauh sauh a, tam tham zawk an han thar chhuak a, a dehralna lamah hmasawnna hmuh tur a awm leh chuang si lo niin a lang.
Political party hrang hrang ten election lai vela an campaign auhla ber chu ‘kuthnathawktute dawm kan’ a ni thin. Sawrkarna fawng chelhtuten engtin emaw chuan hma chu an la ve thin ngei mai, mahse kuthnathawktute dinhmun hi a kâng mawh hle a nih hi!
Tuna sawrkar thar hian kuthnathawktute dawmkanna turin bul chu a tan tha viau niin a lang a, mahse, Mizoram thar chhuah item pali-ah a insawrbing a ni deuh mai a, chu chuan kuthnathawktute a la huap zo lo hle rih a ni.
Tuna kan harsatna pakhat nia lang ta chu, state dangin englai pawha thlai chi hrang hrang an thar chhuak thei reng ang hian, off season lai pawha eng thlai pawh thar chhuak ve reng thei tura tan kan lak hi a ngai tihna a ni. Zikhlum te pawh Mizoramin a thar chhuah theih hmain state pawn lam chuan an lo thar rang deuh bik si a, chu chu sumdawngten eizawnnan an lo hmang lo thei lova, Mizoramin a thar chhuah huna tihtawp thut theih te a lo ni lo thin a, chu chuan harsatna min siam ta thin niin a lang.
Mizoram chhunga kuthnathawktuten fur thlai an tharchhuah ve chhun ang ang pawh hi, thlai thartuten an huan atanga khawpui kawngpui dung inkar thlenga an buaipui vek thin ‘system’ hahthlak tak leh hlawk bawk si lo hi chu a sutkiansak dan (solution) hi chu a awm ngei tur a ni. Hripui (Covid-19) kan tawrh lai pawh khan ‘fuh deuh’ chu a awm kha maw le! Kan duh tak tak chuan kan lo ti thei zel zawng a nih kha!
Eng pawh ni se, Mizoramin zikhlum a thar chhuah tam vanglai hi chuan, state pawn atanga lo lut tur hi chu lo thunun (control) ve deuh hi chu, tun dinhmunah hi chuan kan tih a ngai rih niin a lang.
