Mizorama hna hrang hrang thawka awm Meitei-te chuan an hna ngai chhunzawm tura ngen leh hriattir an nih angin, lungmuang taka an awm theihna’n Mizo mipui leh pawlten hma lakpui turin an ngen.
All Mizoram Manipuri Association (AMMA) thuchhuak chuan, kum 20-30 kalta atangin Mizoramah sawrkar hnuaia thawk leh mimal sumdawnna thilah Meitei 2000 vel chu lungmuang takin an lo cheng tawh a, Mizoram ralmuanna tichhe turin an inhnamhnawih ngai loa, Mizo khawtlang nun inkaihhruaina hnuaiah inrem takin an lo khawsa tawh thin tih an sawi.
Tunhnaia Manipur-a thil thlengah mimal leh pawl thenkhat atangin, Mizoram chhuahsan tur leh an sahimna atan hial pawha pawi thei thil nia ngaih theiha thuchhuah leh tawngkam an hriat tak fo avangin, hreh tak chungin Mizoram an chhuahsan a ngai a, thenkhat phei chu an in luahnaten chhuak tura tihna hial an dawng ta tih an sawi a ni.
Hetihlai hian, an hnathawh chhunzawm leh turin Mizoram sawrkar leh pawl thenkhat atangin phutna leh hriattirna an dawng mek tih sawiin, he ngenna anga thlamuang taka an hna an chhunzawm leh theihna’n pawl leh mimal ang pawhin, an chungah engmah a thleng dawn lo tih tiam a, hma lakpui turin an ngen tih an sawi a ni.
Mizorama awm Meitei ten Mizo mipui ngen
