Mizorama GST kalpui
dan turah inrawnkhawm
Central GST Commissionerate huaihawtin Mizoram Merchant Association (MIMA), Mizoram Road and Building Construction Association, Mizoram Chambers of Commerce & Industries Association leh Goods & Service Tax (GST) khawih thin firm thenkhat chu Thawhlehni khan Aizawlah an thukhawm.
Central GST Commissionerate-a joint commissioner Malsawmtluanga kaihhruaia thutkhawmah hian thil hrang hrang ngaihtuah a ni a. India ram hmun dang atanga Mizorama GST registration an rawn dilin Central GST Commission-in inner line permit (ILP) phut loin an lo register mai thin tih sawi niin, Bengal Eastern Frontier Regulations 1873 zulzuiin hnamdang trade license dilte hnenah ILP guidelines-ah 2 year validity ILP phut turin a inziak a. Hei hi phut dan a awm em tih sawiho a ni a, hemi chungchang hi zirchian a, a theih anga hma lak nise an ti.
GST chungchanga inhrilhhriatna awm lo lutuk chu uluk leh tam zawka inzirtir nise, file kalpui dan pawh inzirtir a nih chuan, GST petuten tlawm zawk leh tha zawka an pek theihna tur a ni dawn tih sawi a ni a. Central GST hotute chuan GST awareness leh zirho chu an duh dan a ni tih sawiin, a ranglama an lo bawhzui tur thu an sawi a ni.
Hnamdang contractor-ten Mizorama hna an thawhin, kim taka GST an pek theihnan hma lak nise, tia rawtna chu tha an ti tlang bawk.
Contractor-ten VAT atanga GST-a luh hmaa VAT rules-a tender chhan ni si, 2017 July-a GST kalpui ni ta si, GST rate-a tax an lo pek tawh leh GST 12% a an chhan, 18% a tihpun hnan taka 18% a GST pek chu claim dan a awm em tih pawh zirchian tura dah a ni.
Hetihrual hian tun dinhmunah SOR 2019 hmang project-ah GST 12% telh a ni a. 13.7.2022 khan 18% ah tih san a ni leh ta si a, Mizoram PWD SOR 2019 hmangtute chuan an agreement rate aiin 6% zelin an pe tam leh tawh a, hei hian contractor-te buaina tam tak a thlen mek tih sawi a ni bawk.
Mizorama GST kalpuidan turah inrawnkhawm
