Mizorama NHM hmalakna endik
November 19-23 chhung khan National Health Mission (NHM) Mizoram chuan 16th Common Review Mission (CRM) a hmachhawn.
Common Review Mission hi sawrkar laipui Ministry of Health & Family Welfare chuan kumtin India ram puma National Health Mission hmalakna endikin, hnathawh a thlirlet bakah hmasawnna awm zirchiang tura din a ni a. He zirchianna atang hian hmalakna tha leh hmasawn ngaihna duan thin a ni.
Kuminah hian India ram state 17 thlanchhuah zingah Mizoram a tel ve a. Tun tum 16th CRM-ah hian Lunglei district leh Kolasib district tlawhchhuakin, NHM hnuaia hmalakna zirchian a ni.
Mizoram endik tur hian Ministry of Health & Family Welfare atangin team leader Dr Sushil Vimal kaihhruaiin mithiam 13 an lokal a. Hmun hniha inthenin Kolasib district leh Lunglei district-a Health facility hrang hrang an tlawh a, thawktute leh mipui an kawm a ni.
Inrinni khan he Mission kharna hi Aizawlah hman a ni a. H&FW secretary Sangchhin Chinzah chuan a hmanpui. Health department official hrang hrang leh National Health programme-a thawktu hrang hrang hmaah CRM team hian powerpoint presentation hmangin an thil hmuh hrang hrang, NHM-in a tih that leh hmasawn ngaihna laite an sawi a, sawiho zui a ni.
Mizorama NHM hmalakna endik
