Mizorama Sairang thlenga rel a luh theihna atan uluk taka a zirchian hnua kawng lo hawng hmasa leh lo bawhzuitu chu Mizoram-a Congress sawrkar a ni tih Congress Thalai hruaitu Laltawnliana chuan a sawi.
Congress Thalai Hqrs. hian Ningani khan Sairang rel station an tlawh a. An president Laltawnliana chuan, Mizoram hmasawnna atana pawimawh, kuthnathawktute thlai thar awlsam zawka hralh chhuah a nih theihnan leh, Mizoram mamawh state pawn atanga man tlawm zawka kan lakluh theihnan bakah zin veivah awlsam leh man tlawm zawka zin a nih theihna tura mellung pawimawh tak, Congress kaihhruai Mizoram sawrkarin a lo buatsaih kha thil lawmawm tak a ni tih a sawi.
Congress sawrkar khan Sairang thlenga rel lut tur hian Mizoram tan hlawkpuina tam tak kan neih tur uluk taka zirchiang hmasa lawkin, India ram leh khawvel hmun danga rel an hman tangkai dan leh Mizoram mipui himna tur ni bawk siin ruahmanna a kalpui tih a sawi a. Rel lo lut tur avanga Mizoram mipui venhimna atan hmalakna hmasa ber pawh 2016 August 5 khan Bairabi Rel Station-ah ILP pek chhuahna tur counter siam a ni tih a sawi.
“Bairabi leh Sairang inkar rel tlan tir a nih theihnan hian central-a Congress sawrkar laiin hma lak a ni a. Act East Policy hmalakna chhunzawmin Sairang bakah Hmawngbuchhuah thlenga rel tlantir tura ruahman leh hma lak a ni. 1991 March 16 khan Badarpur atanga Bairabi thleng rel te chi (meter gauge) tlan tir niin, Bairabi Station hi khatih laia chief minister Pu Lal Thanhawla’n a lo hawng tawh a. Kum 25 a service hnuah central-a Congress ministry-in Act East Policy zulzuia hma a lakna in, Mizorama rel lian chi a luh theihnan Central Railway ministry-in hma a la a, Mizorama Congress sawrkarna hnuaiah chak taka bawhzui a ni a. 2014 November 29 khan Guwahati-ah Sairang thleng kal tur khualzin phur rel lian chi (broad gauge) lungphum chu Prime minister Narendra Modi-a’n a phum ta a ni,” Laltawnliana hian a ti.
Hemi hnu hian chief minister Pu Lal Thanhawla chuan rel kawng a puitlinna tur hian sawrkar laipui lama a bawhzui zel bakah hetihlaia Mizoram larsap Lt. Gen Nirbhay Sharma (Rtd.) pawh nawrpui turin a sawipui fo thin tih a sawi bawk.
Tunhnaia Sairang thlenga rel lut turah social media lamah rel chak chi – Rajdhani a service tur thu leh chu chu ZPM sawrkar hmalakna avang nia sawi awm chu thil zahthlak, mi thawhrim rah zara par chhuan tumna a ni tih Congress Thalai hruaitu hian a sawi a. Railway norms-ah Rajdhani hi state capital tlawh vek tura ruahmanna awmsa a ni tih a sawi.
Rel kawng hawn turah ZPM sawrkar leh chief secretary Khilli Ram Meena ten BJP sawrkar an tlawn luat avanga khawpui chhung nunphung buaina thlen phah thei khawpa ruahmanna an siam erawh Congress Thalai chuan thil tul lo leh mipui palzutnaah a ngai tih a sawi a ni.
Mizorama rel a luh theihna tura hma latu chu Congress sawrkar – Congress Thalai
