Mizorama tlanchhia thenkhat kir leh
Manipur-a Zofate’n harsatna an tawh avangin mi engemaw zat Mizoramah an tlanchhia a, Mizorama tlanchhia engemaw zat chu Manipur-ah hian an kir leh tih thu dawn a ni.
Manipur atanga thu dawn danin, tun hnaiah an ralmuang ta deuh a, mahni in leh lo te an ngaihtuah bawk a, Mizorama tlanchhia engemaw zat chu an let leh. Mahse a zat tak hi sawi theih a ni lo.
Mizoram home department lam pawhin Khawzawl district-a tlanchhia chhungkaw pasarih an let leh tih an chhinchhiah a, kir leh an awm nual na a, chhungkaw pasarihte bak hi chhinchhiah rih lo tih thu dawn a ni.
“Kir leh hi an awm nual a, mahse DC lam atanga report a awm rih lo a. Mi titi-ah pawh kir leh an awm tih hi chu a lang reng a,” official pakhat chuan a ti.
Churachandpur-a an hruaitu pakhat chuan tun hnaiah kir leh hi ni tin an awm tia sawi theih a nih thu a sawi a, mahse inchhiar leh inchhinchhiah a awm loh avangin, an tam em tih pawh sawi theih a nih loh thu a sawi.
“Sumo a tlan tawh a, Mizorama chhuak leh Mizoram atanga rawn kir a indawt zut a. Mizoram pana chhuak passenger hi chu an tam zawk a, Mizoram atanga rawn kir hi an awm ve deuh reng bawk,” a ti.
Churachandpur tak chu a ralmuang rih a, Churachandpur bikah chuan Manipur sorkar a awm lo ang a nih thu sawiin, “DC office an kal a, bank an inhawng a. Sorkar office dang an chawl a, sorkar nei lo ang mai kan ni e,” a ti.
Churachandpur lam chuan Manipur atanga Mizorama lutte hi tlanchhia vek an ni lo tih an sawi a, Imphal airport atanga an chhuah theih loh avangin phaia kal turte’n Mizoram an paltlang a ngai a, chuvangin Mizorama lut hi a hma aiin an tam ve hrim hrim tiin an sawi.
A ralmuang ta deuh tih a nih lai hian hmun hrang hrangah boruak hi chu a tang a, Chawlhni tlaiah pawh khan Kangpokpi district-ah Zo hnahthlakte leh Meitei, mipui ve ve an inkap. Chutianga inep, inep chiah lo, mahse inralring ru renga awm te, chutiang chuan a lehlam lehlam hi an la awm tih thu dawn a ni.
Mizorama tlanchhia thenkhat kir leh
![](https://theaizawlpost.org/wp-content/uploads/tap_logo-min-large.jpg)