Mizorama voter awm zat tichhuak
Kum khat chhunga punna 13516
Mizoramah vote thlak thei chin mi 869813 an awm mek a, nikum February-a vote nei awmzat ennawn hnuhnung ber aia vote nei punna chu 13516 a ni.
Election Commission of India thuchhuak angin Mizoram pumah Photo Electoral Rolls Special Summary Revision 2025 neih a ni a. January 6 khan district tinah tlangzarh a ni. Tuna voter enawnnaah hian vote nei mi 869813 an awm a, mipa 420888 leh hmeichhia 448925 an ni. 2023 February 8 kha Mizorama electoral roll siamthat hnuhnung ber a ni a, hetah hian voter 856297 awmin, hemi aia tuna voter tamna chu 13516 a ni.
Tunah hian Mizoram pumah service voter mipa 4203 leh hmeichhia 91, a vaiin 4294 an awm mek bawk.
Mizorama Assembly constituency 40 atan 29.10.2024 leh 28.11.2024 chhung khan hming thunluh ngai, paih ngai leh siamthat ngai tan dilna hun hawn a ni a, dilna lut hi 2024 December 24 thleng ERO/AERO ten a hmunah kalin hearing neih a ni. District tin (district 11) final electoral roll hi mahni bialtu ERO/ AERO /BLO hnenah emaw DC/DEO office-ah emaw en leh lei theih a ni a. India khua leh tui dik tak, kum 18 tling tawh emaw ECI-in qualifying date atana a puan – 01.4.2025, 1.7.2025 & 1.10.2025 engemaw bera kum 18 tling hman tur chuan mahni bialtu ERO/ AERO /BLO hnenah electoral roll-a inthunluh dilna thehluh chhunzawm theih ala ni.
Aizawl-ah chuan district election officer, bawrhsap Er Lalhriatpuia’n Aizawl district tana final electoral roll hi a tlangzarh a. Aizawl district-ah Assembly constituency 12 a awm a, final electoral roll-ah hian Aizawl district-ah voter 292115 awmin mipa 136350 leh hmeichhia 155765 an ni a, mipa aia hmeichhia tamna chu 19415 a ni. Draft photo electoral roll atanga final photo electoral roll-a voter punna chu 3153 (1.09%) a ni a. Aizawl East-I bialah voter punna percentage a sang ber a, 2.33% a ni; Aizawl East-II bialah voter punna 0.30% niin a hniam ber.
Aizawl district-a voter tlemna ber polling station chu Chhanchhuahna Polling Station niin voter 84 an awm a, voter tamna ber chu Zemabawk-VIII Polling Station niin 1517 an awm.
Aizawl district-ah photo voter ID (EPIC) 100% coverage neih a ni a. Assembly bial 12-ah hian polling station 324 awmin, chawhrualin polling station pakhat zelah voter 901 awm ang an ni. Aizawl district-ah hian service voter 1422 an awm.
Mizoram district tina voter awm zat
District Mipa Hmeichhia Total Punna
Mamit 33564 32988 66552 1451
Kolasib 31174 33519 64693 891
Aizawl 136350 155765 292115 3847
Champhai 28594 30063 58657 1203
Serchhip 26583 28344 54927 766
Lunglei 50679 51625 102304 1534
Lawngtlai 47158 47356 94514 2105
Siaha 22088 23410 45498 787
Saitual 27749 28571 56320 531
Khawzawl 8838 8959 17797 222
Hnahthial 8111 8325 16436 179
Total 420888 448925 869813 13516