Mizoramah bawng tlem tial tial
Mizorama bawng vulh a tlahniam zel a, kum 2019 aiin tunhnai maiah pawh bawng vulh lai sing thum chuangin a kiam.
AH & Vety department hotute chuan bawng vulh kiam zel hi tih pun leh tumin, bawng vulhtu zinga a titha thlanchhuah paruk hnenah bawng kah rai dan tur leh a kaihhnawih hriat tur pawimawh an zirtir a, Thawhlehni khan Aizawlah nei tanin Artificial Insemination Training Centre, AH&Vety Farm Selesihah chhunzawm a ni anga, Zirtawpni thleng a awh ang.
AH & Vety director Dr R Zothanmawii chuan, bawnghnuteah kan intodelh lo hle a, kan bawng vulh leh bawnghnute tharchhuah nasa takin a tlahniam a, tan kan lak a ngai, tiin a sawi.
AH & Vety joint director (LD&B) Dr F Vanlalruata chuan bawng zaa 20 chuan rai lamah harsatna an nei thin a, chutiang chu ngun taka zira enkawl that chuan, chu harsatna chu siamfel theih a ni tih a sawi. Additional director (AH&DD) Dr F Laltanpuia sawi danin, tun dinhmunah bawng vulh lamah kan hnufual hle a. Kum 2019-a chhiarpui neihah Mizoramah bawng 45701 a awm laiin, tunhnaia lakkhawnnah chuan bawng 13042 chauh a awm tawh. Kan bawng neihchhun uluk taka enkawla vulh pun nasat a ngai tih a sawi a ni.
Mizoramah bawng tlem tial tial
