Tun hnaiah Mizoramah Covid-19 vei an pung a, an pun belh mek bawk. Enkawl mek mi 12 an awm a, rinhlelh vanga endik ngai pawh an la awm nual nia hriat a ni.
August ni 23 thleng khan tun thlaah Covid-19 hri vei hi mi 32 an awm tawh a, ni 23 atanga ni 25 thlenga hri vei an awm loh hnuah ni 26 atangin an pung leh.
IDSP te’n an chhinchhiah danin, August ni 26 zanah hri vei hriat thar mi panga an awm a, ni 27 zanah mi pali, ni 28 zanah mi pathum hriat thar an ni a, mi 12-te hi enkawl mek an ni.
Hri vei mekah hian Champhai, Serchhip, Lengpui leh Hriangtlang mi pakhat theuh an awm a, mi dang chu Aizawl mi an ni. Mahse ZMC-a endik vek an nih avangin Aizawl district mi-ah chhiar vek an ni.
Thu dawn danin, hri vei laite nena inhnimhnaih vanga kai (positive contact) pathum an awm a, mi 12-te hi tun hnaia Mizoram pawna zin lo vek an ni.
Natna dang vanga damdawi ina inenkawl, an rinhlelhawm avanga endika Covid-19 vei an ni tih hriatchhuah an ni a, pali chu mimal damdawi ina enkawl, ZMC-a tirh phei niin, mi dang chu ZMC-a enkawl vek an ni tih thu dawn a ni.
Mizoramah Covid-19 vei pung zual
