Naupang kum 5 hnuailam bakah nu naupaite natna hrang hrang laka an him theihna’na vaccine tha taka laktir leh vaccine la tha zawnchhuah runpui – Intensified Mission Indradhanush (IMI) 5.0 chu ramchhung hmundang rualin Thawhtanni atang khan Mizoramah kalpui tan a ni.
He Mission hian Sentut (Measles) leh Sentet (Rubella) natna umbo chu a thlurbing rualin, hri danna pek theih chi natna dang umbo pawh a huam tel a. Natna tarlan pahnih bik hi India sawrkar chuan ramchhung atanga umbo tumin, hun bik ruatin a do beihpui a thlak a, kumin December hi a hun bituk tawp hun a ni. Hemi hma hian hri danna la thei chin zawng zawng, India rama awm tawh phawt chu, ramdang atanga raltlan pawh nise, pek vek tumin hma lak mek a ni.
Beihpui thlak tawpna thawhkhatna hi August 7-11 chhunga neih tur a ni a, a thawhnihna leh thawh thumna chu September leh October-a neih leh tur a ni.
Health department hotute sawi danin, Mizoramah sentut leh sentet hi la umbo kim a ni loa, district thenkhatah a vei hmuhchhuah an la awm thin. Vaccine hi a bikin rama riak thin loneitute bakah Bru leh Chakma chen tamna, khaw hmun nghet nei lo leh khaw hmun nghet neia pawh tlawhpawh harsatna hmunah leh, duh anga tawng inhriatpawh tawk lohna hmunah te pek kim a la harsa tih an lo sawi tawh a ni.
Lunglei district-ah chuan Tlabung SDH hnuaiah khaw 23, Lungsen PHC hnuaia khaw 7, Bunghmun PHC hnuaia khaw 9 leh Hnahthial CHC hnuaia khaw 1-ah beihpui thlak tum a ni a. Mamit district-ah chuan naupang vaccine la an tlem thinna khua – Damdiai, Phaizau, Mualthuam, Rajiv Nagar, Tuipuibari, Silsury, Hnahva, Dilzawl, Kanhmun leh Begabekia ah te tan lak zual tum a ni.
Mizoramah IMI 5.0 kalpui tan
