Mizoramah paragliding training
India rama a vawikhatna atan Mizoramah paragliding training mumal taka huaihawt a ni dawn a. State hrang hrang 12 atangin 45 bakah Mizoram atangin mi 10 an tel dawn.
Mizoram Aero-Sports Association hruaitute sawi danin, Thawhlehni zan khan training khuhhawnna hi Champhaiah bawrhsap hoin an nei a. Champhai bikah hian pilot proficiency 1 leh P2 training neiin, Serchhip lamah P3 training an nei dawn. P2 leh P3 training inkarah hian theory exam tura ruahman a ni a. Training hi May thleng awh tur niin, training chhuakte chu International Paragliding Licence pek an ni anga, khawvel khawi hmunah pawh thlawkin competition hrang hrangah an tel thei dawn a ni.
MASA hian kum 2011 khan Serchhipah International Paragliding Festival dawngin India ram bakah Nepal leh Sweden atangin an rawn kal tih an sawi a. Kum 2015 khan Tourism department nen tangdunin training an buatsaih tawh bakah kum 2018 khan Serchhip-in Pre-World Cup a thlen thu leh kum 2020 leh 2021 ah te pawh training hi buatsaih a nih thu an sawi bawk.
MASA-in a tum ber chu, Mizo thalai paragliding lama tuite tana hma lak a, training buatsaih a ni tih an sawi a. National Aero Sports Policy vision 2030 ah aerosports atangin cheng vaibelchhe 1600 revenue hmuh tum a ni tih te an sawi a ni.
Mizoramah paragliding training
![](https://theaizawlpost.org/wp-content/uploads/tap_logo-min-large.jpg)