Mizoramah raltlan 43000 chuang awm Sawrkar dawnsawn dan kan lawm – MNF

Myanmar, Bangladesh leh Manipur atangin Zofa raltlan Mizorama lut mi 43000 chuang an awm mek a. Mizoram sawrkarin raltlante a lo dawnsawn dan lawmawm an tih thu MNF party chuan sawiin, chief minister Pu Zoramthanga chu pa chan chang zo an tih thu an sawi.
MNF Media & Publicity Department sawi danin, tunah hian Myanmar lama Mizorama raltlan hi a pui a nawiin mi 35126 an ni a, relief camp 162-ah 15589 awmin, mahni laina bel leh hmundanga awm 19458 an awm bawk. Bangladesh Chittagong Hill Tracts atanga raltlan 772 an awm a, Manipur atanga rawn tlanlutte hi May 24 thleng khan mi 7805 an awm a ni.
May 19 thlenga chhinchhiah danin, Mizoram sawrkar chuan Manipur buaina avanga harsatna tawk Zofate tan special-in buhfai quintal 1840 Manipurah a thawn tawh a. Manipur atanga raltlan Mizoram hmun hrang hranga awmte ei turin buhfai quintal 2156 a sem tawh bawk.
MNF chu Mizo hnam tana din, a inanghahna leh lungphum ‘Pathian leh kan ram tan’ tih a nih angin, vawiin thlengin Zofate insuihkhawm lehna atan leh rorelna pakhat hnuaia kan awm theihna tura beitu a ni a. Hei hi MNF thuken niin, tun sawrkar term-ah pawh a ngaihpawimawh zia hai rual a ni lo tih MNF general secretary VL Krosshnehzova chuan a sawi.
“Tunhnaiah Myanmar, Bangladesh leh Manipura Zofaten harsatna hrang hrang an tawk a. Mahni in leh lo chhuahsanin an sahimna zawngin Zofate Jerusalem – Mizoramah an raltlan a. Kan unau kan lo dawnsawn a, kan lo enkawl danah MNF chu a lawm a. Sawrkarin dawngsawnga a tuamhlawm dan te, tlawmngai pawl, kohhran leh political party zawng zawngin kan theihna zawn theuha kan lo buaipui hi a ropui takzet a ni,” a ti.
Myanmar atanga Zofate raltlan tantirhin India sawrkar chuan thawnlet leh turin Mizoram sawrkar a hriattir a chungin chief minister Pu Zoramthanga’n, ‘kan unaute an ni a, an nunna humhim tura rawn tlanlutte hi kan hnawtkir thei lo. A theih ang angin kan lo tuamhlawm dawn,’ tiin, state sawrkar leh mipuiin kan lo tuamhlawm chu lawmawm an tih thu MNF Media Department hruaitu hian a sawi.
Bangladesh unaute an rama an him tak loh avanga Mizorama lo luh an tum tantirh lai khan, India ramri vengtu sipaiten nasa takin an lo dang a. Chief minister Pu Zoramthanga chuan danbeh remti loin, ‘Nangni pawh in chipui Bengali ho Bangladesh atanga India-a an rawn raltlanin in lo hum tho alawm,’ tiin a tang khawng tlat a; sipaite an khawng viau chungin an lo lut tlang thei ta tih a sawi bawk.
Kumin May thla tir atangin Manipur buaina a intan ve leh a. Mizoram mi tangkhangte lakchhuah kawnga Mizoram sawrkar hmalakna chhuanawm an tiin, sum leh pai engemawzat senral a nih bakah Zofa chi peng hrang hrang buaina tawkte Mizoram sawrkarin a buaipuina pawh lawmawm an ti hle tih a sawi a ni.
Mizoram sawrkarin raltlante naupang sikul kal rualte lehkha zirtirin, HSLC leh HSSLC tha takin an pass bakah sawrkarin sawrkar school-ah raltlante luhtir turin zirna lama thuneitute a hriattir tawh tih sawiin, India sawrkarin raltlan thawnkir tur a tih laiin, nationalist sawrkar chuan a tuamhlawm mai niloin lehkha a zirtir hial zawk a, hnam rilru pute an lawm hle, tih te a sawi.
“Zofa hmun hrang hranga cheng harsatna tawkten an inpui Mizoram an belh mek lai a, zo taka pa chan changtu Pu Zoramthanga kan nei hi MNF chuan lawmawm kan tiin kan chhuang a. Zofaten zalenna famkim kan neih theihna tura rammu ngam, ramri humhalh tura silai hmet puak ngam, India ram chhung leh ram pawna Zofate tawrhna mahni chunga tla ang maia hmachhawntu Pu Zoramthanga hi kan chhuang takzet a ni,” VL Krosshnehzova hian a ti.