Mizoramah raltlan sing li chuang awm mek

Myanmar, Bangladesh leh Manipur tea Zo
hnahthlakte’n harsatna an tawk a, mi engemaw zat Mizoramah an raltlan mek. Home department-in an chhinchhiah danin, December ni 20-a Mizorama raltlan awm zat chu 42,962 a ni.
A tam ber chu Myanmar atanga raltlan an ni a, mi 32,196 an an ni. Anni hi Myanmar sipaite’n sorkarna an pawnglak hnua Mizorama raltlante an ni a, sipai sorkar hi anmahni paih tumtute nena an inbeih zui avangin raltlan hi an awm deuh reng.
Myanmar atanga raltlante hi Zo hnahthlakte tih an ni a, kawl pawh a tir lamah khan tlem azawng an awm. Mipui bakah an ram hruaitute pawh an raltlan a, an ram rorel khawl member pawh a tir lam atangin an awm.
Nikum kum tawp lamah Bangladesh atangin Mizoramah Zo hnahthlakte an raltlan a, anni hi mi 1,167 tia chhinchhiah an ni.
Bangladesh-a Chittagong Hill Tracts-a Zo hnahthlakte’n rorelna sang zawk an ngiat a, hemi atana ralthuam lek pawlte leh sorkar sipai an inbeih avangin Zo hnahthlakte hi Mizoramah an raltlan a ni.
May ni 3 atangin Manipur-ah Zo hnahthlakte leh Meitei an inti buai a, hemi avang hian Mizoramah mi 9,653 raltlan an awm mek.
Manipur atanga raltlan zat hi tun hnaiah a tlahniam a, an ralmuan tak deuh hnuah mahni khaw lama kir leh an awm nual vang a ni tih thu dawn a ni.
Home department chhinchhiah danin, Myanmar leh Manipur atanga raltlante hi Mizoram district tinah an awm a, Bangladesh atanga raltlante hi chu Lawngtlai district-ah chauh an awm. Lawngtlai district hi an luhna a nih bakah, he district-ah hian awm khawmtir an ni.