December 3 kha khawvel pum huap ‘Rualbanlote Ni’ (International Day of Persons with Disabilities) a ni a. He ni denchhen hian Mizoramah pawh Aizawl, Lunglei, Siaha leh Champhaiah hun hman a ni. Aizawlah chuan Social Welfare minister Lalrinpuii hoin hman a ni a. Dawrpui Canteen Kual atangin Zarkawt Recreation Centre thleng kawng zawh a ni. Zarkawt Recreation Centre-ah hun hman niin, rualbanlote pualin concert neih a ni a; rualbanloten music band, zai, lam leh skit hmangin an thiam an phochhuak a, tunlai zaithiam engemawzatin kalkhawmte an awi bawk.
He Ni puala thuchah a siamah chief minister Lalduhoma chuan, theihna danglam bik nei (differently abled) te, hmasawnna mil zela an theihna hai chhuahpui hi khawvelin a ngaipawimawh hle tih a sawi a. Kan theihna zawn theuhah kan unaute hi khawngaihna mai ni loa, hmangaihna nen an theihna hai chhuahpui leh huapzo leh awmze nei zawka tanpui theuh turin mitin a sawm tih a sawi.
“Sawrkarin zirna in tam takah rualbanlo naupangte tana chet awlsam zawkna tur hmanrua a siam a, special educator-te pawh mumal leh awmze nei zawka hman tangkai dan a dap mek. An tana hmalak theihna awm apiangah hma kan la zel ang. Mizoram sawrkar hian engtiklai mahin a thlahthlam ngai loang che u,” a ti.
Aizawla hmanpuitu Social Welfare minister chuan sawrkarin Persons with Disabilities Wing hnuaiah commissioner hial kan nei a, mipui dawr thin department leh sawrkar hmun pawimawh hrang hrangah pianphunga rualbanlote tan kawng awlsam – ramp, signage leh a dangte a awm tha em, tih vil rengin theihtawp an chhuah a, an hmalakna hian rah tha a chhuah mek zel tih a sawi.
“Sawrkar hna lak dawn reng rengin rualbanlote pualin 3% reservation kan nei thei ta hial hi hmasawnna a ni a, hna pangngai thawh mai ni tawh loin, pianphunga rualbanlote hian kan tling tawk a, theihna kan nei a ni tih lantir theihnan kumin thupuiah pawh – ‘Amplifying the leadership of persons with disabilities for an inclusive and sustainable future’ tih hman ni,” a ti.
Rualbanlote Ni hi Social Welfare & Tribal Affairs Department, Federation of Mizoram Disabled Organisations leh National Institute for Locomotor Disabilities- Regional Centre tangho bultuma neih a ni a; rualbanlote, an chhungte, an puala thawktute leh anmahni ngaihventu zirlai leh mipui engemawzat an tel.
Mizoramah ‘Rualbanlote Ni’ hmang Sawrkarin a thlahthlam loang che u – Chief minister
