October 1 kha khawvel puma kum upate Ni – International Day of Older Persons a ni a. Mizoramah pawh a kaihhnawih sawrkar department huaihawt leh Mizoram Upa Pawl huaihawtin hmun hrang hrangah hman a ni.Mizoram Upa Pawl (MUP) Unit hrang hrangin anmahni huamchhungah hmangin, intihhlimna leh khawtlang tana thil tha engemaw tih nana hmang an awm bawk. MUP Gen. Hqrs. chuan he ni hi a hranpaa hmang loin, Health & Family Welfare department nen tangdunin Aizawl huamchhung MUP Unit hrang hrang aiawh telna hun buatsaih a ni.
National Health Mission hnuaia National Programme for Health Care of the Elderly (NPHCE) bultumin Aizawlah hian hman a ni a. Health & Family Welfare secretary Sangchhin Chinzah leh Mizoram Upa Pawl president Nghaklianmawia ten an hmanpui.
NPHCE state nodal officer Dr Catherine Lalmuanawmi sawi danin, India ramah kum upa an pung chho tial tial a, zirchiannaah kum 2013 khan India-ah kum upa maktaduai 100 vel awmin, kum 2021 khan maktaduai 138 vel an awm tawh. Kum 2050-ah chuan maktaduai 347 chuang tura ngaih a ni.
Mizoramah mi nawlpui dam rei zawng (life expectancy) a kang chho ve hret hret a. Tunah hian Mizo mipa damrei zawng hi kum 68.3 niin, hmeichhia hi kum 73 bawr nia chhut a ni. Mizoramah mi zaa 8 hi kum upa, kum 60 chin chunglam an ni a. Kum 80 chunglam pawh an pung ve zel.
Kum upate hlutna hi kan hriatchian leh zual a hun hle tih sawi niin, WHO chuan kum upate tana insenso hi thil manhla tak a ni tih hria in hma a la nasa a. India sawrkar pawhin Nationah Health Mission hnuaiah kum upate enkawlna tur pawimawh tak – Programme National Programme for Elderly tih a duang tih sawi a ni.
He programme hnuaiah hian Mizoram pawhin upaten hriselna tha zawk an neih theihna’n kawng hrang hrangin hma a la mek a. Upate tan damdawi in tinah khum 10 dah hran a ni a, district pali-ah kum upate pualin MMU leh Physiotherapy kalpui a ni a, upaten taksa bakah rilru hrisel an neih theih dan tur zirtirna pek a ni.
8 1990 December 14 khan United Nations General Assembly chuan October 1 hi International Day of Older People atan a ruat a. Kum 1991 atanga hman tan a ni.
8 Kum 1954 khan Assam Rifles subedar pension Pakunga hoin mithahnemngaiten ‘Mizoram Pensioner Association’ an din a; member tam zawk an tel theihnan ‘Upa Lengkhawm Pawl’ tia hming vuah leh a ni. Kum 1961-ah ‘Zoram Upa Pawl’ tiin pawl hming thlak a ni a. Kum 1993 khan tuna a hming, Mizoram Upa Pawl tih hian thlak a ni.
8 MUP Assembly hmasa ber hi 1961 May 16-ah Theatre Hall (tuna Vanapa Hall-ah) neih a ni a. Kum 1977-ah sawrkar hriatpuiin Firms & Societies-ah ziahluh a ni.