Mizoram State Anti-Tobacco Day (MSATD) vawi 11-na chu September 11 khan hman a ni a. Health minister Lalrinpuii chuan zuk leh hmuam laka Mizoram thian thianghlim turin sawrkar chuan nasa zawkin tan a la dawn tih a sawi. Mizorama vaihlo leh a kaihhnawih dona ni, State Anti-Tobacco Day (MSATD) vawi 11-na hmanna pui ber hi Lungleiah Health & Family Welfare minister ho hian neih a ni a. Mizo piputen an ram hna thawhnaa thosi leh vaihmite hnawh kianna’na mei an lo zuk thin leh rualkawm nana zuk leh hmuam an intheh thin avanga zuk leh hmuam kan nuna bet tlat anga ngaihdan awm chu, khawvel changkang chhoah hriselna nghawng thil a nih avangin leh a tel loa awm theih a ni a, kalsan a hun tawh tih a sawi.
Zuk leh hmuam ti nasa leh a kentel natna – cancer leh natna dang vei tam state kan ni chu thil zahthlak tak leh ram leh hnam hmai tibaltu a ni tih Lalrinpuii hian sawiin, “Zuk leh hmuam laka Mizoram thian thianghlim turin sawrkarin nasa zawkin tan a la dawn a. Kohhran, tlawmngai pawl leh zirlaite nen tan kan lak tlan chuan kan ram hi kan then thianghlim theih ngei a rinawm,” a ti.
NHM mission director Dr Eric Zomawia’n kumin MSATD thupui, “Zuk leh hmuam laka fihlim thalaite” (Tobacco Free Youth) tih hmangin zuk leh hmuamin hriselna a nghawng pawi theih dan leh a laka fihlim tura inzirtirna a lem nen entirin a sawifiah a. NTCP state nodal officer Dr H Lianthangpuia’n NTCP hmalakna sawiin, kalkhawmte chu vaihlo zuk leh hmuam ti lo turte, chhungte leh thiante pawh fuih thin tur leh vaihloin kan environment a tihchhiat lohna tura theihtawp chhuah tura intiamna a neihpui a ni.
State Anti-Tobacco Day hi Mizoram sawrkar hmalakna in kum 2014 atang khan kumtin September 11-ah hman thin a ni a. He ni hmanna pui ber hi a tumkhatna atan Health minister leh Health department hotute nen Lungleiah buatsaih a ni. Kuminah hian National Health Mission (NHM) Mizoram hnuaia National Tobacco Control Programme (NTCP) leh Comprehensive Primary Health Care (CPHC) tangdun huaihawta hman a ni.
8 Global Adult Tobacco Survey (GATS)-1 (2009 – 2010) tarlan danin, Mizoram mipui zaa 67.2 in vaihlo zuk leh hmuam engemaw tal an ti a. Ami cheng zat azira chhutin India ram pumah Mizoram chu vaihlo tih tamna ber a ni.
8 GATS-2 (2016 – 2017) ah chuan Mizorama vaihlo kaihhnawih hmang hi zaa 58.7 ah a tlahniam tawh a. Tripura dawtah Mizoram awmin zuk leh hmuam hmang/ti nasa pahnihna a ni.
8 GATS-1 (2009 – 2010) tarlan danin, Mizoramah in chhung (home) a mi mei zuk khu hipa secondhand smoke tuartu zaa 96.5 an awm laiin, GATS-2 (2016 – 2017)-ah chuan zaa 84.1 ah a tlahniam tawh.
8 GYTS-2 (2016-17) tarlan danin, Mizoramah naupang kum 13-15 inkar zingah zuk leh hmuam ti zaa 58 an awm a, Mizoram leh Arunachal Pradesh chu India rama sang ber a ni mek.
Mizoramah ‘Vaihlo Dona Ni’ hmang Sawrkarin nasa zawkin tan la dawn – Health minister
