Mizoram Bharat Scouts & Guides State Council chu an president, chief minister Lalduhoma hoin Nilaini khan an thu a, kumin kumtawp lama 8th North East Mini Jamboree neih dan tur an rel.
Chief minister chuan khawvel pumah Scouts & Guides member nuai 483 vel an awm mek a. An awmna hmun theuhah midangte tanpuitu leh nun kawng dik kawhhmuhtu an ni a. Mizoram pawhin hmundangte hmalakna ang bawkin kan ram leh khawtlangah hma kan la ve zel dawn, tia sawiin, “Kan tih theih a tam lo a nih pawhin kan tih chhun chu tihhlawhtlin ngei kan tum dawn nia,” a ti.
Council hian kumin November tawp lamah Tanhrila an hmunah 8th NE Mini Jamboree (Scout & Guide khawmpui) thlen dan tur an rel a. Sum leh pai an mamawh dan sawiin, a hranpaa fund an neih loh avangin sawrkarah an dil a. Chief minister hian he inkhawmpui atana sum leh pai hi sawrkar atanga pek an tum tur thu Council hi a hriattir a ni.
Thutkhawmah hian Mizoram Bharat Scouts & Guides vice president, School Education minister Dr Vanlalthlana bakah vice president tho, Youth Services minister Lalnghinglova Hmar bakah state chief commissioner, Youth Services director H Lalhmingthanga, state secretary Lalngilneia Colney leh member dangte an tel a ni.
Mizoramin a thlen tur Scout & Guide khawmpui thlirlawk
