BJP National Kisan Morcha president, MP ni bawk Rajkumar Chahar chuan Mizoram sawrkarin PM scheme hrang hrang duante a kalpui that loh avangin, khawsak harsa zawkten an tawrh phah nasa hle tih a sawi.
BJP National Kisan Morcha president hi general secretary Dr Shambhu Kumar nen Mizoram an tlawh a. Nilaini tlai khan an party state office-a party mite nen an inkawmnaah Rajkumar Chahar chuan, PM Modi kaihhruaia duan – PM Kisan, loneitute puihna KCC kalpui dan, loneitute leh kuthnathawktute pension scheme kalpui dan, PM Ayushman Bharat leh PM UJJWALA (a thlawna gas connection pek) kalpui dan, PM scheme kaltlanga agriculture lama infrastructure tih hmasawnna tur a taka kalpui dan bakah PM scheme hrang hrang kalpui a nih danah Mizoram chuan a ti tha lo hle a; hei vang hian miretheite, kuthnathawktute leh loneituten an tawrh phah nasa hle, tiin a sawi.
“MLA inthlanpuiah Mizoramah BJP sawrkar a awm ngei theih nan hma kan la dawn a, kuthnathawktuten Mizorama harsatna hrang hrang an neih hi Delhi-ah ka thlen anga, sutkian a nihna turin hma ka la dawn,” a ti.
PM Modi kaihhruai sawrkarin hmarchhak state-te atangin India hmasawnna hna a in tan tur a ni, tia a sawi chu a taka kalpuiin, infrastructure development, education, health, agriculture leh a kaihhnawih lamah nasa takin hma lak a ni a, hmasawnna chu a takin a thleng mek tih a sawi bawk.
Mizoramin PM scheme kalpui tha lo – MP Rajkumar Chahar
