‘Mizotaxi’ app leh a behbawm

‘Mizotaxi’ app chu Mizoramah hman a ni ve ta a, July ni 1 khan transport minister-in a hawng a.
Hemi chungchangah hian nimina Congress Party thuchhuah chuan, ‘sawrkarin 4wheeler leh 2wheeler taxi khalhtute a vau’ tiin he apps hman chungchang hi ennawn leh turin sawrkar an phut a. State Transport Authority(STA)-in quotation leh tender chhuah lovin, sulhnu leh tawnhriat la nei lo firm tharlam tak MoU a signed pui a, hei hi dan bawhchhiatna a nih bakah mipui pawisa eirukna atana kawngka zau tak hawnna a ni; STA-in an thuneihna baka hma an la hi ram dan zahlohna leh mimal hlawkna tura uchuak taka induhsaknaah kan ngai, tiin thuchhuahah tarlan a ni.
Political party pakhatin thil dik lo tia sawrkar a puhna hi, sawrkar pawhin sawifiah a bâ a, hei hi mipui hriatah sawrkar chuan sawifiah ve nghal se a duhawm hle a ni.
STA lam thuchhuak ang chuan, taxi fare atanga 6% chu platform fee a ni ang a, platform fee hi app siamtute chan tur a ni. Hetih rual hian, app siamtute hian platform fee atanga 18% (GST) chu sawrkarah an chhung lut ve thin dawn a ni.
Heti hian i han chhut chhin teh ang: Ni khatah taxi pakhatin Rs 1,000 lo hlawh ta se, chuta tanga Rs 60 (6%) chu app siamtuin a chang ang a, app siamtute hian Rs 60 atanga 18% (GST) = Rs 10.80 chu sawrkarah an chhunglut thin dawn a ni.
A chunga taxi pakhat hlawh chhuah (hypothetical) hi hmang zui zel ila. Taxi 100 chuan ni khatah Rs 1,00,000 an hlawh ang a, app siamtu chan tur chu Rs 6,000 a ni a, GST-ah Rs 1080 a lut ang. Taxi 1,000 ni khat hlawh chu Rs 10,00,000 a lo ni ang a, app siamtu hlawh tur chu Rs 60,000 a ni ang a, GST-ah Rs 10,800 a lut ang.
Taxi (4W) fare hi kilometre khatah Rs 55 a ni a, hei hi sawrkar approved a ni. Chutih laiin taxi khalhtute hian sawrkar rate let thawk deuhthaw hi an la thin a, chu chu thuneitu (STA?) lam chuan an hria, action hi an la lo a nih hmel; ‘report a lut lo’ tih chhuanlam hi chhuanlam tling a ni lovang.
Sawrkar approved thlap taxi fare pawh hmang duh lova, mahni rate hmanga taxi service lo kalpui thang an nih avangin, taxi khalhtute hian sawrkar rate hi an duhkhawp lo nasa mai dawn tih a chiang reng mai a, taxi fare tisang turin sawrkar an han nawr leh ang a, sawrkar chuan ‘petrol man a sâng’ tih behchhanin emaw taxi fare a tisang leh a nih chuan, a tuartu tur chu tu dang ni lovin, mipuite bawk an nih hmel ta a ni.
A enga pawh chu lo ni ta se, tuna Mizotaxi app buaipuinaah hian, platform fee lak theihna hi STA lam chuan thuneihna lo nei tehreng pawh ni se, GST lak theihna dan tlawhchhan tur hi sawrkar hian eng tin nge a lo rel tihte pawh sawifiah ngai tak chu a nih hmel phawt mai a, chiang fek fawkin sawrkar hian han sawifiah ve phawt se a tha ang chu mawle!