New Delhi-a cham mek Labour, Employment, Skill Development and Entrepreneurship (LESDE) minister Lalnghinglova Hmar chuan Nilaini khan Mizoram House-ah National Skill Development Corporation – International (NSDCI) advisor Dr Dnyaneshwar Mulay leh head of International Business Sudhanshu Aggarwal kawmin Mizoram thalaite tan skill training liantham kalpui dan tur a sawipui.
LESDE minister chuan sawrkar laipui hnuaia skill training project-ah Mizoram nena inmil zawk leh Mizo thalaite thiam zawng hna (job role) neih a pawimawh tih NSDCI hotute hi a hrilh a. Mizoram thalaite tan kutthemthiam zirna, skill centre liantham dinna atan hmalak dan tur an sawi.
Kutthemthiam training bakah training chhuakte chhawm zui chungchang sawi a ni a. A bikin rampawna hna hmute chu an kal dan leh thawhzui danah dan ang thlapa kalpui a pawimawh tih sawi a ni. A hma thei angin NSDCI aiawhten Mizoram tlawh a, Aizawla thutkhawm nise an ti.
Sports minister ni bawk Lalnghinglova Hmar hian Nilaini vek khan sawrkar laipui Ministry of Finance-a Department of Economic Affairs hotute kawmin, Asian Development Bank hnuaia Mizoram sawrkar sports project tâng thenkhat a sawipui a ni.
Mizote mil zawng kutthemthiam inzirtirna kalpui dan tur sawipui
