Wahiajer Multi Sports Complex Stadium, Jowai-ah thawhlehni zan hian infiammi nen mipui 15,000 an pung khawm a, Chief Minister Conrad K Sangma chuan Meghalaya Games vawi rukna hawngin a hmuna chhimtu Mizote rilru a khawih hle.
Meghalaya Games-ah hian infiamna chi hrang 25 leh demonstration sports chi 4, a vaiin inelna 29 hmangin district hrang 11 an intihsiak a. Infiammi 3,500 chuang telin technical official 500 rualin an vil a, medal 1,600 vel sem chhuah a ni ang.
Games puala hmunhma an neih thar leh an cheibawl dan fel fai tak bakah inelna chi hrang hrang changtlung taka an kalpui thei vek mai chuan Mizote rilru a khawih a, National Games cho phak khawpa huaihawt thei tura an senso tam turzia an ngaihtuah.
2001 khan Meghalaya Games an nei tan a, a mumal zui lo. Mizoram-in States Games a neih hnuhnun ber 2019 kumah an tharthawh leh a, nikum atangin ropui taka kum tin neih turin an kalpui zui mek.
Garo khawpui lian Tura-ah Jauary 15-20 chhungin nikum khan hlawhtling takin Games an khar a, infiamna chi hrang 22-ah district hrang hrang inelin infiammi 3,300 deuhthaw an tel. An state infiamna hunpui lianah hian sorkarin cheng vaibelchhe 23 a hmang a ni.
Kumin ah Jaintia khawpui lian Jowai-in thleng ve lehin kum kal ta aia hautak zawkin engkim an huaihawt a, CM Sangma chuan : “Infiamna hi medal lak tuma inelna a ni ringawt lo va, nungchang siamna, thawh rim inzirtirna leh inthununna chhawm nun zelna tur a ni,” a ti.
Meghalaya sorkar hian 2024-25 pawisa kum kal mekah thalaite hmakhaw siam nan bik cheng vaibelchhe 2,853 a dah a, hei hian infiamna huam telin hmasawn tumin hma an la hraw hle a ni.
North East Adventist University (NEAU) Associate Professor Dr Job Rothangliana chuan Games hawnna inkhawm a chhim a, ‘hetiang taka an buatsaih thei hi Mizote tan rualawh a na duh khawp mai,’ a ti.
Dr Rothangliana chuan infiamna piah lamah Meghalaya-a hnam hlawm lian pathum – Khasi, Garo leh Jaintia inkara inpumkhatna leh inunauna tha a awm theihna hmanrua atan an hmang nghal a; chuvangin Sangma-a sorkar hian a ngai pawimawhin sum pawh a seng hnem a, kawng hrang hrangin hma an sawn phah ngei dawn tih a sawi bawk.
Games thlengtu ber Jowai bakah a chhehvel khaw hrang hrangin infiamna thenkhat an thleng tel. Dr Rothangliana thawhna Jowai atanga km 3-a hla Khliehtyrshi khuaa awm NEAU-in tennis inelna thlengin : “Court kan neih sa a tha tawh lo hle a, Meghalaya Games atan min rawn siam thatsak vek.
“An zauh bakah synthetic court-in min siamsak a, zana khelh theih turin eng tha tak min chhitsak vek bawk. Chu bakah tennis court thar dang pakhat min siamsak tel a, tichuan court pahnih kan neih phah ta a ni,” a ti.
Ani hi West Jaintia Hills district aiawhin tennis-ah a tel a, mipa singles-ah bronze medal a chuh dawn a ni.
National Games hnuhnung ber 2023 khan state, union territory leh service, a vaiin team 37 inel zingah Meghalaya leh Ladakh chiahin medal an la lo va, Mizoramin gold pahnih leh silver pathum lain medal panga a hawn.
Meghalaya-in Games hmangin 2024 atanga hmasawn tumin sum hlawm lian a seng a; kar hmasa nilaini khan Sangma chuan Indian Olympic Association President PT Usha hnenah 2027-a neih tur National Games vawi 39-na thleng turin an inpeih tih a hrilh.
Uttarakhand-in National Games vawi 38-na thleng ve thungin tun thla tawp lam January 28-ah hawngin February 14-ah khar a ni dawn. India rama infiamna hunpui lian berah hian infiamna chi hrang 14-ah infiammi 81 tir chhuak turin Mizoram Olymic Association a inbuatsaih mek a, sorkar hnenah cheng nuai 37 dilin a la hmu lo.
Hetih lai hian Manipur Olympic Association chuan an sorkar hnenah National Games vawi 38-na atana an senso tur cheng vaibelchhe 2.8 a dil ve thung a ni.
Ziaktu : Thang Khuma (T-a)
Mizote rilru khawihtu Meghalaya Games 2025
