Zirtawpni khan Mizoram Journalists Association (MJA) te’n I&PR Auditorium-ah General Conference vawi 52-na an hmang a, Mizoram hmun hrang hrang atangin thuthar lakhawmtute an kalkhawm.He huna khuallian, Ramchuana, finance secretary chuan journalist-te chu sorkar khalh ngiltu an nih thu a sawi a, sorkar khalh ngiltu nih chhunzawm zel turin a sawm.
Mipui tana ding an ni tih hre turin a chah bawk a, thuthar thehdarh kawngah insum a ngaih chang a awm na a, mipui tana din kawngah chuan insum a ngaia a rin loh thu sawiin, “Mipui tana ding kan nihnaah chuan insum a tulin ka hre lo,” a ti.
American journalist pakhat tawngkam sawi chhawngin, chanchinbumi chuan a siamtu nih te, a ziaktu nih te, a chhuahtu nih te an duh thin a, chung zawng zawng atan chuan ngaithlatu nih a ngai tiin a sawi.
Sorkar thuchhuak, Mizo tawng ngeia ziahah ningnel deuh a awm thei tih a sawi a, Mizo tawng ziak dik tura tan a ngaih thu sawiin, hemi kawngah hian media mite chu mipui zirtir theitu an ni tih a sawi.
Social media a lar thu a sawi a, thlitfim loh na na na chu thil fel lo a tam tih sawiin, thu a dik thei ang bera ziah a ngaih thu te, tan lam nei lova ziah a ngaih thu te a sawi. MJA member-te zingah youtube channel nei an awm chu lawmawm a tih thu a sawi a, an channel a rintlak ang tih a beisei thu a sawi a ni.
MJA president C Lalrambuatsaiha pawhin thu a sawi a, MJA hmasawnna hrang hrang leh hmachhawp te a sawi bakah taima taka thawk tura journalist-te fuihin, teirei peih a ngaih thu a sawi.
“Eng hna pawh thawk ila, nin chang a awm,” a ti a, beih hram hram a ngaih thu sawiin, journalist-te chu an rintlak tur a ni a ti a, MJA member-te chu an rintlak tur a ni tiin, youtube channel-ah pawh MJA member ta chu a rintlak tih a sawi.
Journalist ethics a awm thu leh hei hi ngaih pawimawh a tul thu a sawi a, “Ethics kan nei a ni,” tiin, thuthar lakkhawm leh thehdarh kawngah ethics-in min vawng tur a ni tih a sawi a, hnam pawisawi loh a tul thu a sawi bawk.
Mizo nunah aia upa zah a tul thu leh MJA-ah pawh hei hi an vawn zel thu a sawi a, MJA-ah senior-te an ngai pawimawh a, an zah thin tih te sawiin, thangthar journalist-te pawh hei hi vawng nung zel turin a chah.
MJA General Conference hi chawhma lamah C Lalhmachhuana, vice president-in a kaihruai a, Samuel Lalruatsanga, secretary-in inhmelhriattirna hun hmangin, K Zothanpara, general secretary-in report a pe , Lalrinmawia Sailo, treasurer-in finance report a pe a, Lalnunzira Chawngthu, secretary-in lawmthu sawina hun a hmang. Chawhnu lamah ro an rel a, an inthlang bawk.
2026-28 atana MJA president atan Vanlalrema Vantawl, vice president atan C Lalhmachhuana, treasurer atan Zohmingmawia te an thlang. Executive committee member atan mi 11 an thlang bawk.
MJA General Conference vawi 52-na hmang
