MJA Genral Conference a tiak
MJA Genral Conference vawi 49-na, Gov’t Siaha College Seminar Hall-a March ni 23-a neih chu nimin khan a tiak a, conference hi Mara Autonomous District Council Chief Executive Member M. Laikaw-an a hmanpui.
MJA General Hqrs. Vice President Lalremsiama kaihhruai inkhawmah M. Laikaw chuan thu sawiin, tun laiah social media a chak tawh avangin chanchinbumite chu social media aiin an rintlak tawh tih lantir tura an tan lehzual a ngai tiin a sawi a. Ram hruaituten englai pawhin thurawn an mamawh a, editorial leh article tha tak tak hmanga sorkar hotute leh mipuite’n ngaihdan leh thlir dan tha leh dik an neih theih nan thurawn an pek chu ram tan a tangkai hle tih sawiin, an rilru leh chanchin thar an lak chin tizau a, an hlutna belhchhah turin a chah a ni.
M Laikaw chuan, Autonomous District Council te chu sorkar-in an khawih tur subject 10 a pe a, chung subject 10 zinga thenkhatah chuan state sorkar chu a inhnuk dawk chuang lo niin a sawi a, ADC leh state sorkar thuang hnih-a an kal kawp thin chu kawng tam taka buaina thlentu a ni tih sawiin, hei hian eirukna a tihhluar phah a, hmasawnna pawh a timuang hle, tiin a sawi a. ADC-ten sorkar laipui atanga diirect funding an dil chu inlak hran tumna lam a ni lo a, direct funding hi nei ila chuan central atangin keimahni’n hmasawnna hna thawhna tur kan zuk dil thei ang a, state sorkar sum hmang loin hmasawnna hna an thawh theih phah dawn tih CEM chuan a sawi.
MJA President C. Lalrambuatsaiha pawhin, Covid 19 hri lengin chanchinbumite a tihbuai thu sawiin, sorkar atanga advertisement an hmuh thinte tihhniam niin, chanchinbu a lak zat thlengin a titlem niin a sawi a. Tuna an hun tawn mek chu an hriat chian a ngai a, he hun harsa tak hi paltlang turin engtia kal zel tur nge an nih tih an ngaihtuah a ngai a ni, a ti a. Khawvelah chuai thei lo a awm a, chu chu thu dik a ni tih sawiin, chanchinbu miten dikna an tan tlat chuan an ding chhuak ang tih ring a, hmasawn tura bei hram hram turin a chah bawk a ni.
MJA Genral Conference-ah hian MJA member tunhnaia boralte an sun bakah an mahni hriatrengh thuziak chu an chhungte hnenah hlan a ni a. Chawhnu lamah ro an rel a, kum 2025 MJA General Conference neihna hmun atan Champhai an ruat a, Press Enclave nei tura chak zawka hmalak ni se an tih bakah Mizoram sorkar chu Advertising & Publicity-ah tun aia tam zawk sum dah tur leh Chanchinbu lak man leh advertisement bill awlsam zawka lak a nih theih nan sorkar chu hma laksak turin an ngen a ni.
MJA Genral Conference a tiak
![](https://theaizawlpost.org/wp-content/uploads/2023/03/mja-1024x682.jpg)