Aizawl to Lunglei via Thenzawl (ATL) World Bank Road-a PWD Division Lunglei chan chin kawng dinhmun chu Ningani khan MJA Lunglei member, PWD Road Division leh kawng thawmthatu contractor-ten an en ho.
Aizawl to Lunglei World Bank Road hi kum 2010 khan World Bank suma siam zawh a nih hnuah kum 2019 atanga 2022 thleng khan PWD Division Lunglei chan chin, Lunglei atanga km.64 chu Bhavya Construction Company chuan resurfacing hna a thawk a; Bhavya Company hian kawng thawmthat hna a thawh duh tak loh avangin an security deposit cheng nuai 193 hmangin PWD Road Division Lunglei hian an huamchhung ATL Road thawmthat hna hi a thawk tih sawi a ni.
Hetianga security deposit an lo hman sak avang hian Bhavya Company hi court-ah an zualko dawn leh dawn loh erawh an hre lo tiin PWD hotute hian zawhna an chhang.
MJA-in PWD Lunglei Division huamchin ATL Road an enah hian lirthei chitin tana tlan hreawm lutuk kawng chhia a awm loh laiin, kawng khuar neuh neuh hnawh ngai hmun tam takah a awm tih an sawi a. Kawng khuar thawmthat ngai hi hna thawktu contractor-te hian a hmunah awmchilhin, anmahni sum sengin an thawk a, an hnathawhna sum hi SASCI 2023-2024 atanga pek turin inremna thuthlung an ziak niin an sawi.
PWD Lunglei Road Division hotute chuan ATL Road-a lirthei tlan dan tlangpui, traffic counting hi nikum October khan an nei tih an sawi a. Lirthei chi hrang hrang sang chuang bakah lirthei lian quintal 300 aia rit phur 400 chuangin nitin an zawh niin an sawi. Hetiang a nih chuan, lei atanga kawng chhah zawng 380mm-a an siam thin chu 480mm a siam a ngai tawh tih sawiin, hetianga kawng hnuailam a ngheh tawk loh avang hian a chunglam siamthat ni thin mah se, kawng chhia a awm leh thin niin an sawi.
MJA-in kawng dinhmun enfiah
