Mizoram Journalists’ Association (MJA) member-te tana 2 Assam Rifles-in National Integratiom Tour a buatsaiha kalte chu Thawhlehni khan Mizoram an thleng a; an zin chhungin state pathuma hmun hrang hrang an tlawh.
AR National Integration Tour (NIT) a kalte hian September 18 khan Guwahati an pan a, Arunachal Pradesh-ah China ramri – Bumla Pass thlenga an kal bakah Tawang, Jang, Dirang leh Bomdila-a hmun pawimawhte an tlawh. Bhutan ramri an tlawh bakah Laitkor, Shillong-a Assam Rifles hmunpui ber – Director General hmunhma leh Shillong-a hmun pawimawh dang an tlawh bawk.
Tawang khawpui daia India sipai, 40 Infantry Brigade an tlawhnaah commander Brig. Devrat Shekhawat leh officer dangte nen an inkawm a; DGAR an tlawhnaah Brig. Rohit Sehgal leh officer dangte nen an inkawm a ni.
Indian Institute of Management Shillong an tlawh a, IIM hotuten an hmunhma fanpuiin, an dinhmun tlangpui an lo hrilh.
MJA chuan an ngenna anga Assam Rifles hotuten NIT an buatsaih sak chu lawmawm an tih thu a sawi a. A bikin a tul anga hma latu – 23 Sector commander (DIG) Brig. Girish Upadhya leh PRO Lt.Col. Swati Negi, 2 AR commander Col. Mukesh Suhata leh officer dangte chungah lawmthu a sawi a ni.
MJA Integration Tour nei zo
