Lunglei district National Highway 302 kawng chhe lutuk chu mipuiin an tuar na tawh hle tih West Tuipui bialtu MLA Nihar Kanti Chakma chuan a sawi a. Sawrkar chu a theih anga hma la turin a ngen.
Thawhlehnia Assembly Session-ah MLA Nihar Kanti Chakma hian speaker phalsak angin ‘calling attention’ hun a hmang a. Tlabung leh Lunglei inkar, NH 302 kawng chhe lutuk avanga mipui tawrhna a auchhuahpui.
Tunhnaiah Khawthlangtuipui lian avangin Tlabung leh a chhehvel khaw hrang hrang an buai a, buhfai leh nitin mamawh dang a harsa tan tawh tih a sawi. Hetihlai hian a hma daih atanga NH 302 kawngpui chhia vang hian lirthei an tlan tha hleithei loa, nitin mamawh mai niloin, damlo te leh zinmiten an tuar nasa a, kawng chhiaa tangkhang rei lutuk avangin hmunpui lam pan tum damlo pahnih chuan nunna an chan phah tawh tih a sawi. Amah ngei pawh Assembly Session-a tel tur hian a lirtheia kal ngaihna awmloin kawng chhia hian a dang a, 207 pik up hmangin hun rei tak hnu ah he kawng chhia hi an chhuahsan theih chauh tih a sawi bawk.
Kawng chhia avanga Tlabung leh a chhehvel mipuiin harsatna an tawh hi sutkian a nih theihna’n hma laksak turin West Tuipui bialtu MLA hian state sawrkar a ngen tih a sawi a ni.
PWD changtu chief minister Zoramthanga chuan NH 302 kawng chhiat thu hi sawrkarin a hria a, a theihna chinah theihtawp an chhuah tih a sawi. He kawng hi Border Roads Organisation hnen atangin state PWD-in kum 2009 khan a lachhawng a, 2021 thlengin enkawlin NHIDCL-in a la ta tih a sawi. Tuna kawng sial mekah hian sawrkar laipui chuan cheng vaibelchhe 1439 a ruahman a, compensation leh forest clearance hmuh har vangin hun ruatsaah hna tan theih a ni loa, fur a lo ni chho nen, harsatna a thleng ta tih a sawi.
State sawrkar enkawl ni tawh lo mah se, NHIDCL leh an hnuaia contractor-te chu an nawr reng a, mipui harsatna sukiang turin tan an la reng tih a sawi a ni.
MLA-in Tlabung kawng chhia House-ah aupui
