Mizoram Upa Pawl Aizawl West III Area chuan Thawhlehni khan Area Conference vawi 13-na an hmang a, bialtu MLA VL Zaithanzama’n a hmanpui.
MLA chuan ram changkang apiangah upaten ngaihhlut leh ngaihpawimawh an hlawh a, thluak fim kan tih hun hi kum naupang lam ni loin kum upat hunah a ni thin, tiin a sawi.
“Naupan laiin nu leh pa kan ngaisang thin a, kan han leikang a, nu leh pa ngaihhniamna leh sitna a awm fo thin. Kum a tam chho a, an hlutna kan hre tial tial a. Parawn nih tling tur chuan kum upat ve deuh a ngai a, upate hlutna hrethiam tur pawhin tawnhriat ngah ve phawt a ngai,” VL Zaithanzama hian a ti.
Upate atanga Mizo zia leh nunphung tha hriain kan chhawmnung zel a, Mizo sakhua leh nunphung, Mizo nihna tak chu upate atanga kan rochun leh chhawmnun a ni tih a sawi. Ram rorelna leh inkaihhruaina kawngah pawh upa lam chu a khaipa an ni lo thei loa, thangthar mithiam tak tak karah pawh upa thu a fing thin, an tih angin, an kaihhruaina tel loin ram a kal thei lo tih a sawi bawk.
MLA-in upate hlutna sawi
