Mizoramin MLA inthlanpui a neih mekah Mizoram sawrkar hnuaia awm police leh state pawn atanga chahluh police, an vaiin mi 7218 an duty mek.
Mizoram Police thuchhuak chuan, tun inthlanah hian candidate 174 an awm a, heng candidate-te himna hi Mizoram Police chuan a ngaipawimawh hle a, candidate tinte hi him taka an awm theih nan PSO pek vek an ni, a ti.
Him taka mitinin vote kan thlak theih nan Mizoram Police chuan venhimna lamah ruahmanna siamin, civil police mi 1831, state armed police force (SAPF) atangin 2527, central armed police force (CAPF) 2700 bakah Mizoram Home Guard 160 nen, a vaiin mi 7218 duty-in an tir chhuak a ni.
Hengte hi polling station duty, sector police officer, Nakas (checkpoint), inter-state border check post, Static Surveillance Team, Flying Squad, EVM guard, observer security, security for candidates, CAPF/SAPF liaison officer, Quick Response Team, District Striking Force, Control Room operation, area domination, District Election Cell, PHQ Election Cell, reserve forces, vehicle security, dispatch leh receive centre security, zonal officer bakah ramri venghim leh tul dang ti atan hman an ni.
Inthlan campaign chhunga mipuiin Mizoram chhunga remna leh muanna an vawnhim chungchangah Mizoram Police chu mipui chungah a lawm hle tih sawiin, ‘Campaign hun chhungin state pawn atangin nitin VVIP tam tak an lo kal a, chu’ngah pawh chuan harsatna pakhatmah awm loin tluang takin campaign hun hman zawh a ni. Hei hian Mizoramin democracy a ngaihhlutna leh inthlan muanawm tak neih a duhna a tilang a ni,’ a ti.
Vote thlak hun chhunga state remna leh muanna vawnghim chhunzawm zel turin Mizoram Police chuan mipui a ngen a. Boruak muanawm tak hnuaia vote thlakin, India ram hmundangte tana entawn tur chhawp chhuak leh turin a ngen tih a sawi. ‘Mizoram mipui, Mizoram Police nena thawk hoa, police leh election official dangte thu zawm a, inthlan hlawhtling tak kan neih theih nana thawk tlang turin kan insawm a ni,’ a ti.
MLA inthlan kaihhnawihah police 7218 duty-in chhuak
