By Reuben Lalnunthara Hnamte
Kan hma lawk December 2023-ah Mizoram Legislative Assembly (MLA) inthlanpui kan lo hnaih ta viau mai a. Mizoram hmasawnna tura hruaitu tur mi 40 ngawt kan thlang chhuak leh dawn a. Hruaitu neih hi Pathianina a lo ruat a ni a. Thuthlunghlui hun lai atang tawhin Pathian chuan Israelte hruaitu tur phei chu Amah ngeiin a lo ruat thin a ni. Khawvelin hma a lo sawn zel a, hmanlai anga lal inthlahchhawng (Dynasty) leh Dictator taka rorelna chu paih bo lo niin, tunah chuan khawvel hmun tam zawkah mipui rorelna ( Democracy) Lo piang ta zel a ni. Democracy tih hi mizo tawng chuam mipui rorelna/ mip[ui thlan sorkar tih a ni a. Hruaitu tur kan thlan rualin a roreltu chu mipui kan ni tihna a ni tel a ni. Chu chuan hruaitu kan thlanchhuah kawngah mipui mawhphurhna sanzia chu a hril awm e. Democracy ramah chuan mi tin hian dikna chanvo(Human right) kan nei vek a. Hei tak hi mi tinte kan hlutna leh pawimawhna chu a ni. Tute party nge kan thlan lal ang a, tunge kan vote ang tih lam chu mi tinte mawhphurhnaah a innghat thui hle a; kan thlan thiam loh leh a tuar tur chu mipui tho kan ni.
Kan mawhphurhna a ni : Mi tin ten vote kan thlak theihna tur hian kan ram danpui Article 326 leh Representation of People’s Act, 1951 section 62 hmanga dikna chanvo pek kan ni a.Vote thlak hi vote nei zawng zawng chuan kan mawhphurhna a ni a, nimahse, tu tihluih theih mah chu kan ni lo. Chutih rualin Ram khua leh tui kan ni a, vote kan nei a nih si chuan kan tihmakmawh chu a ni lawi si. Remchanlohna engemaw tak nisilova, a pawnga taka vote thlak duh loh rikngawt hi mi puitling lo zia a ni a, India khua leh tui kan ni a, vote neih kan duh a kan siamtir a kan nei a nih si chuan vote thlak ngei hi kan tih makmawh a ni. Vote thlak hi a hlauhawm lo va, sakawlhg chibai bukna lah a ni hek lo; kan mawhphurhna pawimawh tak a ni tih I hre thar leh ang u
Kan hlutna a ni : Vote thlak thei, vote nei thei kan nih chuan kan hlu hle tihna a ni. Tumahin kan vote tur chung changah mi tilui thei lova, keimahni duhthlanna liau liauah a innghat a ni. Vote kan nei a nih chuan inthlan dawnah chuan VIP kan ni mai a, kan pawimawh lai tak a ni. Party hrang hrangin an rawn rim huai huai che ang a, a hmaa be tha ngai lo leh engahmaha ngailotu che nia i hriat pawh khan inthlan dawnah meuh chuan an be tha huam mai dawn che a ni. Party hrang hrang kha i lakah an rawn interview ringawt mai dawn a, i hlu vet vet hle dawn a ni. Hetih hun lai hi chuan Mizorama mi pawimawh tawpkhawk i ni dawn a, i vote a zirin tu te emaw chu an tlingin an tla dawn bawk a. I hlu hleuh hleuh viau ang. Hetih lai tak hian kan hlutna leh pawimawhna hmang thiam a, duhthlanna dik kan neih a pawimawh hle dawn a ni. I vote kha sum nei deuh lei mai mai theihin nei lo la, tawngkam thiam avanga hneh mai mai theih ni hek suh. Ram changkang apiangah khua leh tui ten inthlanna hi ram hnuk khawih thil tak meuh a ni tih an hriat avangin an ngai pawimawh a, an ngaihlu a, an la thutak bawk a. Chutiang bawkin, rahbehna nasatna ram apiangah vote thlak hlut zia (vote thlak leh inthlan awmzia chu a hma lamah ka sawi tawh a) an hre chiang bawk.
Tu te nge kan vote ang : Hei tak hi kan fimkhur a pawimawh hle mai. Inthlan dawnah hi chuan party tin mai hi an tha vek mai a. An thiltum leh an kalhmang tur pawh a tha em em vek mai. Nimahsela, Mizoram mipuite tana hmasawnna siamtu tur leh, kan ram min hruai tha thei tur kha an pawimawh ber. Nangma mimal hamthartna ringawt i thlir chuan nangmah pawh i dik lo tihna a ni. Mimal hmathatna tur ni lovin, kan ramin hma kan sawnpui tur leh mipuite huapzo sorkar kan neih kha a pawimawh ber a ni. Mi tam tak chuan inthlan hi vote thlak chauh emaw kan ti thin a, hei hi a dik lo. A hmaa kan sawi tawh ang khan, inthlan hi ram rorelna bul intanna a ni. Kohhran huang chhunga tawngkam lar tak chu, “Committee/Council hi a rau lai tak chu a ni,” tih hi a ni. He tawngkam awmzia ber nia lang chu, committee/council thut khawm lai, kohhran kalphung tur leh hmasawnna tur leh a member, mipui te kalphung leh hawi dan tur engkim rel a nih hun laia fimkhur loh emaw, uluk loh emaw, tihsual neih palhin kohhran inrelbawlna leh member te thlarau nun thlenga a nghawng pawi theihzia sawina a ni a. Inthlanna hi political party te thuneihna inchuhna emaw kan ti tlat leh politician te lal inchuhna emaw kan ti tlat hi a pawi hle a. Inthlanna chu mipui ten ram kalsiam tura kan duhthlanna thiang tak hmanga lungphum nghet taka kan phumna a ni zawk a, chu mi chungah chuan kan mi rawih (politician) ten kan duh dan angin ram kal an rawn siam dawn tihna zawk a ni. Chu vangin, sawrkar kalphung emaw, ram hruaitu te kan sawisel luai luai hian mi tam tak hi chuan mahni mawng kan hlim a ni tih hi kan inhre lo.
America ram leh Great Britian ram te khu political party 2 inlal chhawkna ram (Multi party system) ram an ni a. Keini ram anga party behchhan vote emaw, mimal hamthatna tur chauh avanga vote ang hi an ti ve ngai meuh lo. Chu vang chuan a nia, US President thlanna-ah pawh party ruihchilh ni lem lo leh tan lam bik nei lo, issue azira an vote pekna thlak thlak thin, swing voters an tih te an pawimawh em emna chhan khu. Chutiang chiah chuan Britain-ah pawh khuan vote an thlak dawna thutlukna an siam dawna mipui ten behchhana an hman ber chu party manifesto te, party in candidate an rawn thehchhuah te record leh party pahnih, Labour party leh Conservative party ten sawrkarna an chelh hnuhnun bera an record a tha em tih te uluk takin an zir hmasa a, chu mi hnuah tha ber tura an ngaih angin vote an thlak mai thin. Keini anga party-in an rawn din tir ang ang emaw, hmelhriat an nih vang ngawta vote pek ang chi hi an ti ve ngai meuh lo a ni. Chuvang chuan mi tin te hian kan hma lawka MLA inthlanpui kan hmachhawn turah hian vote kan thlakna tur kawngah kan fimkhur em em a ngaihna chu. Kan sawi tawh angin mi tinte hian vote kan nei a nih chuan kan hlu hle a, vote pawh kan thlak ngei tur a ni a. Tu te nge kan vote ang tih lamah chuan mahni mimal hamthatna emaw, hmelhriat leh vua leh vang lam ni lovin, ram tana mi tha turte kan vote kha kan zaa mawhphurhna pawimawh tak a ni e.