Zoram Research Foundation leh NCCI hnuaia India Peace Centre leh Aijal Club te tanghovin Thawhtanni khan Mizoram State Planning Board Meeting Room-ah ‘40 Years of Harmony: Legislative Dialogue on Peace Building’ tih thupui hmangin Remna Ni chungchang sawihona hun an buatsaih a, MLA ni laite leh a hluite’n an sawiho.
He hman puitu Lalfamkima, deputy speaker chuan, “Kan vawiin hun hlutna leh kan hun hman mek ropuina hre tur chuan Zofate hun kal tawh kan hriat a tul a ni,” a ti.
Remna Ni Vawi 40-na (June ni 30), Mizoram Peace Accord Ruby Jubilee puala hun hmanah hian kalkhawmte’n kum 40 liam taa Mizoram Accord ziah a nih atanga tun thlenga Mizorama remna leh muanna tluantling tak a awm dan te, inremna ngelnghet kan neih avanga kum 40 chhunga kawng hrang hranga Mizoram dinhmun te an sawi a, remna boruak hnuaia Mizoram than zelna tur leh hmasawnna tur kawngte an sawi bawk.
Sawihonaah hian Mizoram hual veltu state dangah buaina leh tharum thawhnain nasa taka thla a zar reng laia kum 40 chhung nghet taka remna leh muanna kan vawnghim thei chu Mizote chhuanawmna ber zinga mi a ni tiin, Pathian awmpuina leh a remruatna a ni tihte an sawi.
Remna leh muanna derthawnzia hriat reng a tul thu te, mihringte chenhonaah boruak eng emaw hlek avanga buaina leh tharum thawhna lian tak chhuak thei reng a nih thu te, Mizoram pawhin kan thenawm state dangte dinhmun thim leh rapthlak tak ang hi kan tawng ve thei reng tih hriat a tul ziate an sawi a, kum 40 chhung lo vawnhim tawh inremna hlu tak hi vawnghima tungnung zel turin mipui aiawh tura thlan MLA te an pawimawh tih te an sawi.
“Remna kan neih hma, kum 1986 hma lamah kha chuan kan tlang ram mawi tak hi silai puak ri thuai thuai te, nunau mangang au ri rawng rawng te, lungngaia tap leh rum riin a khat a ni. Chhungkuate thendarh an ni a, khawlaiah ruang
MLA leh MLA hluite’n Remna Ni sawi ho
