MNF a sawrkar leh dawn – Dr L Thangmawia

Lengteng bialtu MLA Dr L Thangmawia chuan Pathian leh mipui zarah MLA inthlanah MNF a sawrkar leh ngei dawn tih a sawi.
Thawhtannia Lengteng bial ramri Tuivawl kama campaign khuhhawnnaah Lengteng bial MNF official candidate Dr L.Thangmawia chuan Pathian leh Lengteng bial mipui zara MLA term khat a chelh ve thei leh MNF hruaituten official candidate tura an dah leh ta chu a fel vang ni loin, Pathian hruaina leh Lengteng bial mipui tawiawmna vang a ni, tiin lawmthu a sawi a. Tun term kal mek chhunga a tih tur a tih lohah te, a tih loh tur a tih leh bial mipui rilru tihnat palh a awm chuan bial mipuiin ngaidam turin a ngen tih a sawi.
Tun inthlanpuiah Lengteng biala a ding leh thei tur chu lawmawm a tih thu sawiin, Pathian leh Lengteng bial mipui chungah a innghat tih a sawi a. Lengteng bial leh mipui tan a thawh chhunzawm zel theih bial mipui zarah a tlin leh ngei a beisei tih a sawi a ni.