Pathianin MNF dinchhuahna tur hun a ruat a thleng chho mek a. MNF beitute chu an ral zel tih an party president Zoramthanga chuan a sawi.
MNF Sub. Hqrs. Lunglei huaihawtin Thawhtanni khan Municipal Council inthlan tur inbuatsaihna atan Lungleiah kawngzawh (rally) neih a ni a. MNF president Zoramthanga leh vice president Lalthlengliana ten an hmanpui.
MNF president chuan Pathianin MNF dinchhuahna tur hun a ruat a thleng chho mek tih sawiin, “MNF beitute chu an ral zel. Pathianin a hun a tih chuan kum 2018-ah MLA 27 min pe mai,” a ti.
Lunglei Municipal Council inthlanah MNF a chak a ring a, kumtawp inthlanpuiah pawh chakna chan a beisei tih Zoramthanga hian a sawi. “Lunglei mipuiin kan candidate in lo thlantlin ngei ka beisei a, in inchhir loang. A hringtu kan ni a, hringtu ngeiin hnute tuia a chawm seilen tluka tha a awm lo,” a ti.
Thuamluaia Mualah Lunglei mipui duh angin floodlight dah a ni dawn a; Lunglei by pass road atana cheng vaibelchhe 10 dah chuan a daih lo lutuk a, Lunglei tana hmasawnna turah hman a ni, tiin, by pass road zawhfelna daih turin vbch.30 vel a ngai a, chutiang daih tur project siamin, a nawr mek tih a sawi.
ZPM chuan inhampuarna’n tula hria in, Pu Duhoma chief ministerial candidate atan an zuar tih a sawi a. Congress leh MNF in chief ministerial candidate a hranpaa an vuah ve ngai loh thu a sawi. Kalphung thar nei nia insawia mipui hnena chhin ve tura inzuar mekte chuan kalphung thar hlir vawi 10 vel an nei tawh a. Mipuiin engah mah an ngai lo nge, under 10-ah an awm leh thin tih a sawi a ni.
Congress chu beih tham an awm tawh lo nia sawiin, an ni angin “kihhnawk” an sawi ve ngai lo tih NNF president hian a sawi bawk.
“MNF chuan hmathlir kan nei a, chumi hlawhtlinna’n kan thawk thin. Lunglei hmasawn na’n Municipal Council din nise kan ti a; kan bawhzui leh mai. MNF hi ram hmangaihtu dik kan ni,” a ti.
MNF beitute chu an ral zel – Zoramthanga
![](https://theaizawlpost.org/wp-content/uploads/2023/03/lcm-1024x769.jpg)