MNF party chuan 2024 Lok Sabha inthlanpuia an candidate atan, tuna Rajya Sabha MP ni lai K Vanlalvena an ruat a. Tun term kal mekah Rajya Sabha thutkhawma NDA sawrkar dodal nasa ber pawl a ni tih amah hian a sawi.
Zirtawpni khan MNF office, Mizo Hnam Runah MP inthlana an candidate tur hi party president Zoramthanga’n a puang a. Rajya Sabha MP ni chunga mipui aiawhtu leh thil tha tam tak titu a ni, tiin K Vanlalvena hi a sawi.
Pathian remruat a lo thlen chuan MNF chhiat ber lai, 1998 MLA inthlanah an chak a, MP pawh an nei chho mai tih a sawi. “Tunah hian MNF ni lo, Congress ni lo, enchhin hunah kan awm. MNF sawrkar kha la ding zui nise, min beitute min vawmna kg.1 kha tunah chuan kg.2 a ni hial tawh ang. Kum 2028-ah chuan kan chhe nasa hle ang. Hei vang hian Pathianin MNF min thukru rih a ni,” a ti.
NDA-a tel chungchang a sawinaah Zoramthanga chuan, “NDA hi political party hrang hrang thutkhawmna mai a ni. Keini chuan kan thuthlung kan kalsan ve ngai lo. India nen kan inremnaah pawh Mizote sakhua (Kristian) humhimna turin kan nawr tlu. Kan hnam himna nghawng thei thilah central-a NDA sawrkar do zawngin kan kal zel a. CAA, FMR, Assam- Mizoram ramri leh Manipur unaute buainaah kan dinna kan la sawhsawn ngai lo. NDA do na ngam ber chu MNF kan ni,” a ti.
Parliament House-ah Mizote tan huaisen ber tur chu tun dinhmuna kan hriat leh kan hmuh mek, K Vanlalvena a ni, tiin, “Kan Chawngbawla a ni,” a ti.
MNF candidate K Vanlalvena chuan inthlan campaign-na atan sum leh pai a nei loa, pi leh pu atangin belhfakawm chhuan tur a nei loa, mipui khawngaih beiseiin Pathian leh kan ram tan a rawn pen chhuak dawn tih a sawi.
NDA leh INDIA inepna karah regional party-te an tel ve dawn a. Mizoram MP chuan sawrkar siamnaah kori a tu phak loa, NDA a sawrkar leh ngei a rinawm a, Uniform Civil Code a rawn tipuitlin pawh a rinawm tih a sawi.
“NDA sawrkar do a tul nasa dawn. Term kal mekah a dodal nasa ber pawl ka ni. MP fang tan thiltih a harsa a, amaherawhchu au bengchhen a ngai. Hindi thiam a pawimawh an tih laiin, kum thum leh a chanve chhunga thu sawi lo an la tam mai. Hindi leh English thiam aiin rilru puthmang a pawimawh zawk. English thiam lutuk aiin ka Sap tawng thiam dan hi a tawk chiah a, an hrethiam zawk,” K Vanlalvena hian a ti. Lok Sabha-a thlantlin a nih chuan Mizo tawngin thu a la sawi dawn, tiin Mizoram mipui vote a dil nghal a ni.
MNF candidate K Vanlalvena “NDA dodal nasa pawl ka ni”
