MNF party chu mahni hamhaina leh pumpui tih puarna ringawt atana belh chi a ni ve loa, mahni inphata ram leh hnam tana inhlantute awmna tur a ni tih MNF hruaitu R Tlanghmingthanga chuan a sawi.
Thawhtannia Mizo Hnam Run inkhawmah MNF National Core Committee member R Tlanghmingthanga chuan he thu hi a sawi a. India leh MNF inremna avanga inhungbikna Article 371 (G) kan neih chu a hlu a. India Parliament meuh pawhin pass mah se, Mizoram Legislative Assembly remtihna lo chuan hman ve ngawt a theih loh, tia sawiin, “Forest (Conservation) Bill 2022 MNF sawrkarin ram tana him loa a hriat avanga a lo hnawl tawh ZPM sawrkarin NGO leh political party-te rawn loa a adopt ngawt kha a pawi hle,” a ti.
Pathianin duh taka a siam Mizo hnam chhanhim turin hnama pianthar a ngai tih a sawi a. He hnam venghim tur hian Pathianin midang daih, hnamdang daih a ruat loa, keimahni Mizote ngei kutah a awm tih sawiin, “Hnama min siamtu Pathianin min siam chhan leh ni tura min duh kan nih theihnan hnamah kan pianthar a ngai a. Pathian leh kan ram tan titu MNF kan ni tih hrereng ang u,” a ti.
An kal tawh dan enin insiamthatna tur tam tak an nei a, insiamtha chung zelin Pathian leh ram tan hmalam pan zel tur an ni tih a sawi bawk.
MNF hi pumpui tih puarna ngawt atana belh chi a ni lo – R Tlanghmingthanga
