MNF hruaitu in ramri tlawh

MNF senior vice president Dr R Lalthangliana chuan Inrinni khan Zokhawthar a tlawh a, ramria insumdawn tawnna hmun leh check gate te a tlawh.
SASCI kaltlanga cheng nuai 1500 hmanga thawh, 2023 August 19-a hawn, Land Customs Station Zokhawthar tih changtlunna tura project ‘Infrastructure Development for Border Trade Facilitation at Zokhawthar’ chu Commerce minister hlui Dr R Lalthangliana hian a tlawh a. Hemi rual hian MNF sawrkar hmasa, kum 2000 vela hmalakna hrang hrang bakah ramri check gate a tlawh nghal bawk.
Ram hmasawnna atana border trade hmasawnna chu MNF ministry-in a ngaihpawimawh zia a langchiang hle, tiin, Zokhawthar khawtlang hruaitute pawhin lawmthu an lo hrilh a ni.
August 30 zan khan Gospel Music Ministry (GMM) buatsaih Bible ziak chhuaktute leh zaithiam chawimawina programme Champhaia neih chu Young Men’s Christian Association Aizawl president ni bawk Dr R Lalthangliana hian a hmanpui a. YMCA chu London United Kingdom-ah 1844 June 6-ah George Williams leh a thiante mi 12-in an din a. Thalai nun khaw lo tak taka hmangte Krista hnena hruai, tih thupuia neia din a ni tih a sawi. Khawvel pum huapin Kristian thalai ang chuan pawl lian ber a ni tawh a. Hun reilote chhunga Champhaiah YMCA din a ni chu lawmawm a tih thu a sawi a ni.
YMCA hi India ramah Region 9-ah then a ni a. Hmeichhia pawh member a ni theih a. Mizoramah Aizawl leh Champhaiah YMCA hi din a ni tih YMCA North East India Region chairman ni mek Dr R Lalthangliana hian a sawi a. Gospel Music Ministry Champhai-in hlabu an buatsaih chu a tlangzarh a ni.