MNF-in a rukin hna 695 an la hman – B Lalchhanzova

MNF-in a rukin hna 695 an la hman
– B Lalchhanzova
MNF sawrkar khan a ruk takmeuhin hna 695 an la hman a, sawrkar zel ta se a ruka hna lak a pun hle a rinawm tih minister B Lalchhanzova chuan a sawi.
Thawhtannia ZPM office-a inkhawmah ZPM Media Committee chairman ni bawk B Lalchhanzova chuan, MNF sawrkarin kum 5 chhungin pension 932 an tihfel hman laiin, ZPM sawrkar kum hnih pawh la tlin hma in mi 23000 chuang pension tih fel a ni tawh a; MNF sawrkarah a ruka hna lak a tam a, an term chhung khan a ruk takmeuhin hna 695 an la a, ZPM sawrkarah chuan hna lak tur hi chanchinbu leh social media lama puan chhuah hmuh tur a awm deuh reng tih a sawi.
MNF sawrkar laia dan loa kuhva tawlh zalen lutuk chu ZPM sawrkar hnu ah Hachhhek tlangdung kuhva chingtuten kuhva rah an hralh leh thei ta a, Hachhek tlangdung mipuiin kuhva hralhna tha buatsaihsaktu ZPM chu an hrechiang tan mek tih a sawi.
MNF la sawrkar se, sawhthingin ngaihsaktu a nei zui lo anga, kum kal mekah sawhthing hralhna chhiat ber kum a thleng chungin, mipuiin thutlukna dik siamin ZPM sawrkarna an pe a, sawhthing kum chhiat ber kumin sawhthing leina cheng vaibelchhe 135 chu mipui account-ah an thun tawh tih minister hian a sawi a ni.
“MNF kha la sawrkar se chuan, sum hmanga hnathawh a chhe em em zel anga, phunin awmzia a awm lo ang. A hun taka hna thawh zawh loh a tam em em anga, hnathawh endik dan mumal a awm zui lo ang. Mipui sawrkar a lo din tak hnu chuan chief minister chairman-na hnuaiah State Project Monitoring Committee din a ni a, ha hriam tak nei a ni a, namnul ngawt chi a ni ta lo,” a ti.
ZPM sawrkar chuan kum 5 chhungin a tam thei ang ber thil tangkai tih hman tumin au hla an nei a. Sawrkar kal tawhte chuan kum 5 chhung chuan thil tak tak a tih hman loh, tiin chhuanlam an siam thin tih a sawi a. Chutihlaiin kum hnih chhunga ZPM sawrkara an beisei erawh a sang hle thung si tih a sawi.
Party lian nia inchhal MNF leh Congress inrintawkna a tlahniam nasa a, kumin kumtira VC/LC inthlanah an thawkho nasa a, Dampa by election-ah inthlan dawn hnaihah Congress beidawngin MNF an pui a, BJP candidate lahin a khawchhuahpui Vanlalsailova tihtlak hrim hrim chu a goal a nih vangin BJP hmangin MNF a pui bawk tih B Lalchhanzova hian a sawi.
LADC inthlan neih turah MNF leh Congress hi thawhdun leh an tum tih a sawi a. LADC sawrkar liam turah hian CEM panga an nei hman a, MNF, Congress leh BJP ten rilru inhmu tak tak si loin sawrkar nghet lo din tumin an tangho leh mek tih sawiin, “Thawhhonaah hian Congress hi a tuartu an ni zel a, a ‘lion share’ neitu chu MNF an ni deuh zel. AMC inthlanah pawh an thawh ho mai a rinawm,” a ti.