MNF-in an president la ring tawk
MNF party chuan an president Zoramthanga leh a thawhpui office bearers an ring tawk a, an chungah beiseina an nghat tlat tih an sawi.
Thawhlehni khan Mizo National Front National Executive Meeting chu Aizawlah neih a ni a. Danbul ennawn a, siamthat ngaite siamthat remtih a ni a, party hmalak zel dan tur hrang hrang rel a ni bawk.
Resolution an pass zingah – an president Pu Zoramthanga leh a thawhpui elected OB-te kaihhruaina hnuaia tunhnaia hnehna an chan leh party-in nasa taka hma an sawn zel avangin an chungah rinna leh beiseina an nghat tlat tih an sawi.
ZPM kaihhruai sawrkarin sum harsatna chhuanlama mipui chhiah leh thil dang tam tak hmangin min run mek, tiin, hetihlaia chief minister leh a thuihruaiten nasa taka an inhaivur lawi si chu an dem tih a sawi. ‘Mipui chan hui a, tih retheiha kan awm mek hi a pawi kan ti a, he tawrhna laka chhuak tur hian MNF chuan theihtawp a chhuah zel dawn a ni,’ a ti.
Sinlung Hills Council Election 2024-ah HPC(R) nen thawhhona tha tak hnuaia hnehna an chang chu lawmawm an tih thu an sawi a. Council huamchhung mipui chungah lawmthu sawiin, tluang tak leh tha taka kal turin duhsakna an hlan tih an sawi.
Mizoram mipui zawng zawng Krismas leh kumthar thlamuang taka hlim tak leh lawm taka hmang turin duhsakna an hlan bawk.
(BOX)
MNF NEM resolution dang:
* Mizoram hmun hrang hranga kawng a chhe em em mai leh lei dawh mek hna muang lutuk hi mipui ngaihthahnaah kan ngai a, mipui tana ngaihtuahna sen aiin mahni inhaivur leh hlimhlawp lam ringawt sawrkarin a buaipui hi lungchhiat thlak kan ti.
* Kuthhnathawktute thlai thar – sawhthing, hmarcha, aieng leh hmunphiah lei ngei tura an intiam lai a, lei mumal awm loa, hmangaih leh duhsak bik hlawh tura an sawite an hawihai mai hi pawi kan ti a. An intiamna rate ang ngeia lei sak tawh turin ZPM sawrkar kan phut a ni.
* Duhthala sawrkar sum chinleh tum a, thuneihna pumhmawm tum a, VC term kaltluang lai thawhpui duhloa, thla 6 chuang pawt tawi a, mipuiin an thlante zahna nei miah loa democracy an pawngsual hi demawm kan ti a; chhuanlam mumal nei loa buluk taka rorelna kalpui mek ZPM sawrkar kan nei hi vanduaithlak kan ti takzet.
* Ni 100 chhunga tih tur an intiam tihhlawhtlin an nei mumal lo leh, kum khat dawn an sawrkar hnuah pawh hmalakna mumal hmuh tur awm lo ZPM sawrkar kan hrawn hi mipui kan vanduai hle a. An insawi anga awm lo, sawi loh ang zela khawsa sawrkar hi sim a, an mawhphurhna hrechiang tawh turin kan phut a ni.
* Chhiah tipung ve lo tur leh sum puk ve lo tura insawi ZPM sawrkarin, inhaivurna atana mipui hnen atanga ration buhfai man 100% a an tipungte, stamp duty 200% a an tipungte, OIL atanga chhiah nasa taka an la leh, thlatin mipui phur tirit zual tura sum a puk awlh awlh reng hi a pawi kan ti a. Heng avanga mipui nitin mamawh thil man pung chho zel kan tuar hi lungchhiatthlak kan tiin, mipui harsatna phuhruk thin MNF sawrkar ding leh thuai turin theihtawp kan chhuah ang.
* Kan unaute chenna ram leh tualchhung buaina avanga sahimna zawnga rawn lutte tuamhlawm kawngah leh an thlavang hauh kawngah Mizorama sawrkar chu hnam thinlung pu tawkloah kan ngai a; kan sakhaw humhimnan pawh huaisenna tlachham hle ah kan ngai. MNF chuan hmun hrang hranga kan unaute tawrhna tawmpui leh hrerengin, an tan nghet takin kan ding zel dawn. Kan unaute thlavang hauh kawnga Rajya Sabha MP Pu K Vanlalvena’n theihtawp a chhuah thin hi lawmawm kan tiin, kan chhuang a, kan thlawp a ni.