MNF-in hruaitu kan nei tha ber – Lalchhandama Ralte

MNF-in hruaitu kan nei tha ber
– Lalchhandama Ralte
MNF party chu hruaitu nei tha ber party an ni tih MNF vice president Lalchhandama Ralte chuan a sawi.
Village council inthlan neih zawh taka Serchhip district atanga MNF VC tling tharte chawimawina Nilainia Serchhip-a neih a hmanpuinaah Lalchhandama Ralte chuan, MNF-in hruaitu an nei tha ber tih chu party miten pawm turin a chah a. Ram leh hnam tana bei a, thatlai hun zawng zawng hmangral hruaitu an nei tih a sawi.
MNF mi chu khawiah mah mikhual cheta che tur an ni loa, ram neitu dik tak an ni tih a sawi bawk.
ZPM chu nationalism kengtu nia insawi thin an nih laiin, an sawrkar hnuah nationalism nekpuar thil a thleng foa, hnam tana an din ngam loh zia a lang ta zeuh zeuh niin leader of opposition Lalchhandama Ralte hian a sawi.
“Thil fuh lo a awmin sawrkar kal tawh an mawhpuh a, a tha lamah anmahni thawh angin an sawi leh thung. Mawhphurhna la ngam lo sawrkar kan hrawn mek a. Mizoram tana beitu pawl hrang hrang, NGO-ten he sawrkarah hian mak tih an ngah a, an beidawng a, an ring tawk lo mek a ni,” a ti.